Një ngjarje tragjike ka ndodhur ditën e sotme në Cossombrato të Astit pranë Torinos, ku një 59-vjeçar shqiptar ka vrarë ish-gruan dhe partnerin e saj të ri, e pastaj ka kryer vetëvrasje.
Mediat vendase raportojnë se autori i dyshuar është Astrit Koni, i cili prej 20 vitesh jetonte në Itali, ashtu si edhe viktima Drita Koni.
Sipas hetimeve paraprake dyshohet se Astrit Koni kishte tentuar disa herë të rikthehej me ish-partneren, por kjo e fundit e refuzonte pasi ishte në një marrëdhënie të re.
Sipas hetimeve fillestare, 59-vjeçari i ka sulmuar viktimat me një mjet pune të mprehtë, duke i goditur për vdekje.
Më pas, ai është ngjitur në kullën e kështjellës, ku thuhet se ai punonte si kopshtar dhe është hedhur duke i dhënë fund jetës së tij.
Karabinierët në fillim kanë gjetur trupin e autorit, ndërsa pas disa orësh kërkimesh u zbuluan edhe trupat e dy viktimave në një zonë fushore pranë hyrjes së fshatit.
