Zbulimi i trupit të një gruaje, i nënti në dy muaj, ka ngjallur shqetësim të madh në Afrikën e Jugut, pasi nëntë gra janë gjetur të vdekura në zonën Ekurhuleni, në lindje të Johanesburgut, që nga korriku.
Trupi i fundit u gjet të enjten në mëngjes në zonën e Dawn Park, në anë të rrugës. Sipas policisë, gruaja ishte gjysmë e zhveshur dhe e mbështjellë me një çarçaf, ndërsa identiteti i saj ende nuk është bërë i ditur.
Incidenti ka rritur shqetësimin në zonë, por autoritetet thonë se ende nuk është e qartë nëse nëntë vdekjet janë të lidhura me njëra-tjetrën apo nëse pas tyre qëndron një vrasës serial.
E gjitha nisi më 15 korrik, kur u gjet trupi i parë. Dy ditë më vonë, një i dyshuar në këtë rast u arrestua dhe mbetet në paraburgim. Policia nuk e ka lidhur këtë person me vdekjet e tjera.
Zbulime të tjera pasuan në gusht dhe shtator, në zona të tilla si Kempton Park, Olifantsfontein, Clayville dhe KwaThema. Disa prej grave u gjetën pjesërisht të veshura dhe me lëndime.
Mes viktimave ishte edhe 38-vjeçarja Elizabeth “Tsontso” Moselakomo, e cila u zhduk javën e kaluar pasi doli nga shtëpia për një vrapim pasdite. Trupi i saj u gjet tre ditë më vonë pas një hoteli në Kempton Park.
Dy gra të tjera janë identifikuar si Itumeleng Kekana, e cila ishte zhdukur që nga korriku, dhe 38-vjeçarja Dino Evelyn Motapane, trupi i së cilës u gjet në anë të rrugës në KwaThema të martën.
Gruaja e fundit, e cila vlerësohet të jetë rreth të 30-ave, sipas mediave lokale kishte mavijosje dhe plagë të shkaktuara nga thika.
Policia ka ngritur një ekip të posaçëm për të hetuar vdekjet. Ekipi përfshin detektivë, oficerë të inteligjencës, ekspertë mjeko-ligjorë dhe specialistë të tjerë, për të shqyrtuar nëse ka ndonjë element të përbashkët mes rasteve.
Autoritetet po kërkojnë gjithashtu një “person me interes”, të cilin e kanë përshkruar si të tillë, por ende nuk kanë sqaruar se me cilin prej rasteve është i lidhur.
Police have confirmed that the ninth body is that of a woman believed to be in her 30s. She was discovered by a passerby in Villa Liza, in Boksburg, Ekurhuleni.
Credit: Chriselda Lewis#UpdateAtNoon #sabcnews pic.twitter.com/R0nGsiwIxH
— SABC News Radio (@SABCNews_Radio) September 17, 2026
