Nga Laura Musa
Ekzistojnë shumë rreziqe përreth shtëpisë që mund të cojnë në fatalitet për qenin tuaj . Për shkak të kuriozitetit dhe tendencën e tyre për të eksploruar botën duke përdorur gojën e tyre ata mund të hanë sende të zakonshme shtëpiake që janë potencialisht toksike. Kategoritë kryesore të sendeve të zakonshme shtëpiake më të rrezikshme mund të përmendim :
1. Ushqimi jonë i përditshëm
Vetëm se ushqehemi me ushqim të zgjedhur dhe të mirë për ne, nuk do të thotë se është njëlloj edhe për mikun tonë me katër këmbë.
Çokollata është njëra prej tyre. Për shkak të përmbajtjes së kafeinës dhe theobrominës, ajo kthehet në toksike për qentë sepse, ato nuk mund t’i tolerojnë mirë këto substanca. Toksiciteti i saj varet nga disa faktorë si sasia e konsumuar, lloji i çokollatës së marrë sepse çokollata e zezë është më e dëmshme etj. Çokollata është një nga ushqimet më të zakonshme toksike, por ka edhe të tjera: për shembull Avokado përmban persinë e cila shkakton diarre dhe të viella tek qentë që e konsumojnë.
Rrushi dhe rrushi i thatë mund të shkaktojë pamjaftueshmëri akute të veshkave. Xylitioli një substancë e cila është përdorur si sheqer në shumë produkte çamçakëzi, karamele, mente etj mund të shkaktojë çlirim të lartë të insulinës që çon në dëmtim te mëlcisë. Rritja e insulines sjell hypoglicemi.
2. Rodenticidet
Janë përbërje kimike që përdoren kundër brejtësve. Përdorimi i tyre, mbart gjithmonë me vete edhe rrezikun e helmimit edhe te kafshëve të tjera, ku më të predispozuar janë qentë dhe macet.
Më të zakonshmet janë substancat me veprim antikogulant si Warfarina, Bromadioloni etj. Warfarina vepron në mëlci duke penguar sintezën e faktorëve të koagulimit, duke kundërshtuar veprimin e vitaminës K, duke cuar në hemorragji të brendëshme. I njëjti mekanizëm veprimi si te rodentët (minjtë), është edhe për qenin. Në cdo rast duhet urgjentisht të kontaktojmë me veterinerin.
3. Medikamentet humane
Në këtë kategori mund të përmendim acetaminofenin (paracetamoli) dhe ibuprofenin. Tek macet paracetamoli është tërësisht i kundraindikuar sepse është shumë toksik. Macet nuk mund ta metabolizojnë dhe ta ekskretojnë acetaminofenin. Asnjeherë mos i jepni mikut tuaj me katër putra, medikamente pa u konsultuar më parë me mjekun veteriner.
4. Metalet e renda
Ndër më të zakonshmit janë plumbi dhe zinku. Shkaku më i zakonshem i toksicitetit nga zinku është përmes gëlltitjes së monedhave. Shenjat klinike janë probleme gastrointesinale dhe anemi nga shkatërrimi i eritrociteve. Për heqjen e tyre, është e nevojshme të ndërhyet nëpërmjet metodave kirurgjikale, që të ndalohet më tej edhe thithja e zinkut nga organizmi. Helmimet nga plumbi tek qentë janë më të mëdha sesa mund të mendohet. Shenjat klinike për qentë e helmuar nga plumbi, lindin më shpejt sesa kafshët e tjera.
5. Produktet e pastrimit
Këtu kemi parasysh detergjentët, detersivët, sapunët, pastruesit etj. Këto produkte janë toksike si për ne ashtu edhe për qenin apo macen tonë. Shumica e tyre shkaktojnë lezione sipërfaqësore dhe të thella në mukoza gjithashtu edhe probleme gastrointestinale. Kontakti i kafshëve me këto produkte është frekuent prandaj duhet të jemi te kujdesshëm përsa i përket vendit dhe sigurisë ndaj tyre. Prognoza ndaj këtyre kimikateve shkon deri në të keqe, madje mund të jenë të nevojshme edhe nderhyrjet kirurgjikale.
