Analisti Lorenc Vangjeli, i ftuar në një emision “Trialog” në RTSH ku po diskutohet mbi situatën e Partisë Demokratike dhe lëvizjen e Ervin Salianjit, tha se një lëvizje e tillë nuk duhej të sulmohej, por të përqafohej si një linjë zyrtare e partisë.
Sipas Vangjelit, Sali Berisha është shndërruar në një “nyjë të dyfishtë”: nga njëra anë pengon PD-në, ndërsa nga ana tjetër e mban paradoksalisht të bashkuar.
Berisha, tha Vangjeli, e ka shndërruar partinë në një ndërtesë “Airbnb”, ku dhomat nuk jepen për vizitorë, por shpërndahen si zyra për ambicie të vogla.
“Nëse do të kishte pasur më tepër logjikë brenda përbrenda partisë një lëvizje e tillë nuk duhej të sulmohej, por duhej të përqafohej dhe të bëhej gati gati një linjë zyrtare e partisë. Është një shkrepëse e ndezur në këtë errësirën tonë politike për të kuptuar se në çfarë situate jemi. Në opozitë, Berisha është shndërruar në nyjën e dyfishtë, në nyjën që i ka mbetur në grykë PD, por edhe në nyjën që e mbanë të bashkuar, në mënyrë paradoksale, PD-në. Berisha, prej kohësh, e ka shndërruar partinë si një ndërtesë airbnb, ku nuk jep dhoma për të kaluar natën shtegtarët, pro i shpërndanë ato si zyra, për të mbajtur brenda ambicie të vogla”, u shpreh ai.
Duke e zgjeruar analizën edhe tek Partia Socialiste, Vangjeli tha se Edi Rama e mban PS të bashkuar “falë hijes së pushtetit dhe aftësisë së tij për të menaxhuar dobësitë njerëzore”.
“Nga ana tjetër, e njëjta situatë, pavarësisht se duket sikur nuk lëviz asgjë, kështu e mban edhe Rama bashkë PS. E para me hijen e rëndë të pushtetit dhe aftësinë e tij të jashtëzakonshme si menaxheri i dobësive njerëzore. Kjo e mban bashkë PS”, tha Vangjeli.
