Gjykata e Tiranës zbardhi arsyetimin e vendimit të dënimit të ish-ministrit, Spiro Ksera, me 1 vit e 8 muaj burg për akuzën e “vjedhjes duke shpërdoruar detyrës”.
Vendim i arsyetuar ndaj ish-ministrit të Punës dhe Çështjeve Sociale dhe tre ishvartësve të tij, i siguruar nga “Panorama”, nxjerr në dritë “mëkatet” e ish-zyrtarëve të akuzuar gjatë procedurave për realizimin e gjashtë aktiviteteve për shtresat në nevojë.
Spiro Ksera në gjykatëSpiro Ksera në gjykatë
Sipas Gjykatës, shkelje janë vërejtur që në përzgjedhjen e fituesve të tenderit 25 milionë lekë për organizimin e aktiviteteve nga një bashkim kompanish, që nuk kishte kapacitetet e nevojshme dhe deri te mbushja me dokumente fiktive të dosjeve të organizimit të aktiviteteve.
Gjykata arsyetonte se dy kompanitë private të kontraktuara nga ministria kishin si objekt të veprimtarisë shërbime nga inertet e deri te shërbimet funerale, por jo me organizimin e eventeve.
Në dokumentet e falsifikuara të përdorura në këto procedura janë konstatuar dhe tre nënshkrime të Juela Meçanit, ishkëshilltare e Kserës, për mbledhje të zhvilluara disa ditë pasi Meçani kishte ndërprerë marrëdhënien e punës në këtë ministri.
MËKATET KSERES
Referuar vendimit të gjykatës, zyrtarët kanë zhvilluar fiktivisht aktivitetet, për të cilat janë lëvruar në total gati 30 milionë lekë nga buxheti i ministrisë.
Në rastin më të mirë, aktivitetet nuk i kanë ngjarë aspak planifikimit, ndërsa në rastin më të keq, nuk janë zhvilluar fare dhe dosjet për to janë mbushur me dokumente fiktive, foto të manipuluara, apo video që u përkasin aktiviteteve të tjera dhe pa fatura justifikuese për shpenzimet e kryera.
Në dosjen për eventin “Prioriteti i MinoriteteveBarazi në të drejta”, aktivitet 8- ditor në qershor-korrik 2013 në Dropull është gjetur një DVD me pamje të një aktiviteti të kryer në mars 2013 në nder të ish-futbollistit Lefter Millo.
Në dosjen shoqëruese të një aktiviteti tjetër, i zhvilluar sipas dokumenteve më 28 qershor-1 korrik 2013, është gjetur një DVD me pamje të një aktiviteti të prillit të atij viti, aktivitet i financuar nga PNUD dhe jo nga ministria. Njëkohësisht fotot shoqëruese nuk përkonin me aktivitet të kësaj date.
Aktiviteti “Mosha e tretë vlerë për shoqërinë” ka kushtuar 4.3 milionë lekë dhe pretendohet se janë shpenzuar për qëndrimin dyditor në Durrës të 50 të moshuarve të “Shtëpisë së të moshuarve”.
Sipas Gjykatës, aktiviteti nuk është zhvilluar fare, ashtu si dhe disa aktivitete të tjera të cilat figurojnë vetëm në letër. Në një tjetër aktivitet, të programuar për fëmijët e verbër, janë parashikuar pajisje fonie 10.000 vatë, si dhe pajisje të ndryshme, për 6 ditë, por nga fotot rezulton që trajnimet të jenë bërë në klasa, vetëm me ndihmën e një “cd player”-i./panorama/a.k
