Më shumë se 500 djem kanë pësuar dhunë fizike dhe seksuale në një shkollë kori katolike në Gjermani midis viteve ‘45 dhe ‘92, sipas një raporti të publikuar sot (e martë).
Sipas raportit të juristit Ulrich Weber, të paktën 547 djem të korit të famshëm në të gjithë botën, Domspatzen, janë viktima të dhunës fizike dhe seksuale, të 49 abuzuesëve.
Weber, i cili e filloi studimin e tij në vitin 2015, është ngarkuar të merret me këto hetime fill pas skandalit të abuzimit seksual të vitit 2010, ku u përfshinë pjestarë të Kishës Katolike. Ai tha se viktimat ishin pre e “dhunës, frikës dhe pafuqisë”, ndërkohë që e krahasuan shkollën me “burgun, ferrin apo kampet e përqëndrimit”.
“I gjithë sistemi arsimor ishte orientuar drejt arritjet më të mëdha muzikore dhe sukseset e korit”, thotë raporti. “Krahas motiveve individuale, edhe ato institucionale, pra, ndrydhja e fëmijëve me qëllim disiplinën dhe përkushtimin masimal, krijuan bazat për dhunë”.
Weber tha se faji për abuzimet bie pjesërisht mbi njëfarë “kulture heshtjeje” dhe drejtoi gishtin nga Georg Ratzinger, i cili drejtoi korin nga viti 1964 deri në vitin 1994. Weber thotë në raport se “Ratzinger i injoroi ato që po ndodhnin dhe nuk ndërhyri”.
Ratzinger, vëllai i ish Papës Benedict, ka mohuar se ka pasur ndonjë dijeni për abuzime gjatë kohës që ai drejtoi korin.
Weber tha se ai i gjeti të 49 abuzuesit e dyshuar, por vuri në dukje se janë të pakta gjasat që ata të ndiqen penalisht, duke qenë se i kanë kryer kë krime përpara shumë kohësh.
Dioqeza lokale katolike tha se do t’u ofrojë viktimave dëmshpërblim deri në 23 mijë dollarë deri në fund të këtij viti.
a.ç
