Ish-ministri i Brendshëm, Sandër Lleshaj ka komentuar deklaratat e kryeministrit Rama që KFOR të marrë nën kontroll Veriun e Kosovës.
I ftuar në emisionin Review në Euronews Albania, Lleshaj nënvizoi se rritjen e rolit të KFOR në Kosovë, e përcakton NATO dhe jo aktorët lokalë në rajon. Megjithatë ai shtoi se shtimi i trupave të KFOR është diçka e mirë për Kosovën, pasi nga NATO nuk i vjen asgjë e keqe.
“Tërheqja e policisë së Kosovës ka krijuar vakum dhe dikush duhet ta marrë aty kontrollin. KFOR duhet të ketë më shumë rol, këtë rol ia përcakton NATO, nuk ja përcaktojnë aktorët lokalë.
Më shumë KFOR më shumë NATO është më mirë për Kosovën sot dhe sa herë të jetë e nevojshme. Nuk ka kurrë humbje Kosova nga prania e KFOR-it, e kundërta shkakton humbje për Kosovën”, tha Lleshaj.
Për afrimin e ushtrisë serbe në kufi me Kosovën, ish-gjenarali tha se Beogradi nuk mundet kurrësesi ta sulmojë Kosovën.
“Vuçiç e ka detyrim kushtetues të ecë në atë pikë, unë nuk besoj që mundet të sulmojë, kurrësesi nuk mundet. Por Serbia ka dëshmuar gjatë këtyre dekadave që kanë kaluar, që është e gatshme t’i hyjë aventurave të tilla. Asnjë s’ka mundur Serbia në Ballkan por shumë gjak ka derdhur në Ballkan, në Bosnjë, në Kroaci dhe në Kosovë.
Por mos të harrojmë që ajo kordinohet me Rusinë. Kaloi si tangent, mosvendosja e sanksioneve të Serbisë, një vendi negociator për Bashkimin Evropian. Janë pafundësisht shenja të qarta që duhet të ishin parë në kohë”, tha Lleshaj.
/a.r
