Mazhoranca do të votojë në seancën plenare të së hënës Kryeprokurorin e përkohshëm. Komisioni i Ligjeve zgjodhi 3 nga 7 kandidatët që u vetëofruan.
Mazhoranca e ka bërë të qartë se zgjedhja e Kryeprokurorit të përkohshëm do të bëhet me shumicë të thjeshtë. Zyrtarizimi i emrit që do t’i përcillet Kuvendit do të bëhet në mbledhjen e Grupit Parlamentar të Socialistëve, që pritet të mbahet përpara seancës plenare.
Në garë për postin e kryeprokurorit të përkoshëm janë Arta Marku, Ermira Tafani dhe Ferdinant Elezi.
Sipas socialistëve emri që do të pasojë Adriatik Llallën do të ketë funksionet e Prokurorit të Përgjithshëm deri në ngritjen e Këshillit të Lartë të Prokurorisë, që është organi i ngarkuar me ligj që bën përzgjedhjen dhe rendit tre kandidatët më të kualifikuar, emrat e të cilëve më pas ia përcjell për votim Kuvendit, që zgjedh me 84 vota nga propozimet e sjella.
Opozita sot në protestë para parlementit
Partia Demokratike në bashkëpunim me aleatët e saj do të zhvillojë sot protesta para parlamentit për të kundërshtuar zgjedhjen e prokurorit të përgjithshëm.
Burimet kanë bërë të ditur se mbështetësit do të tubojnë para të dy hyrjeve të seancës parlamentare, ku nuk përjashtohen as hedhja e sendeve drejt parlamentarëve, por dhe në këtë rast duke shmangur dhunën.
Mësohet po ashtu se do të jenë kryetarët e degëve të PD që do të mbajnë peshën kryesore të menaxhimit të pjesëmarrësve.
Ndërsa deputetët e Partisë Demokratike do të jenë pjesë e parlamentit, ku do të debatojnë me mazhorancën si dhe do të organizohen për të mos lejuar, sipas tyre, votimin e njëanshëm dhe në shkelje të kushetutës së kryeprokurorit të përkohshëm. Por ashtu si dhe më parë, një pjesë e deputetëve do të dalë nga salla e kuvendit, për tiu drejtuar pjesëmarrësve të protestës.
Demokratëve do ti bashkohen po ashtu dhe mbështetësit e Lëvizjes Socialiste për Integrim, por dhe të partive të tjera parlamentare dhe jo parlamentare
a.ç
