Kandidati i Partisë Demokratike për Bashkinë e Tiranës, Halim Kosova ka thënë se pas fitores do t’i japë kryeministrit Edi Rama ose akullore ose ëmbëlsirë.
Gjatë një takimi me banorët e Kombinatit, Kosova një ditë pasi shefi i qeverisë tha se do pijë kafe me të në 22 qershor, ka thënë se ai do fitojë garën për kryebashkiak e kështu do t’i jap Ramës ose akullore ose ëmbëlsirë.
Gjatë prezantimit të programit të tij Kosova i kërkoi një kafe kryeministrit të vendit, për të rritur bashkëpunimin politik.
Ndërkohë nga Lezha, Rama tha se do pranonte të pinte kafen më kandidatin demokrat, por në 22 qershon dhe në ambientet e maternitetit.
Kosova ka premtuar përmirësimin e gjërave të vogla në dukje, por të rëndësishme për komunitetin. Kosova u ka thënë banorë të kësaj zone se tre do të jenë objektivat prioritare dhe 100 për qind të realizueshme gjatë mandati të tij të parë në krye të bashkisë së Tiranës: ulje të taksave me 30 për qind, furnizimin me ujë 24 orë të çdo cepi të Tiranës si dhe ndërtimin e 100 rrugëve në dy vitet e para të mandatit të tij të parë.
“Do të ulim deri në 30 për qind taksat si një mënyrë për të gjeneruar vende të reja pune, pasi kryefjala jonë është punësimi. Tirana në fund të mandatit tim do të ketë 24 orë ujë, kudo në çdo cep, dhe do të jetë ujë me të gjitha parametrat. 100 rrugë janë llogaritur si të domosdoshme në 2 vite të mandatit tim dhe çdo fshat do të lidhet me rrugë plotësisht të asfaltuara me kryeqytetin”, tha Kosova.
