Skënder Minxhozi/
Halim Kosova mbajti mbrëmë fjalën përmbyllëse të fushatës së tij, në mitingun e zhvilluar nga opozita në sheshin Nënë Tereza. Besnik ndaj linjës së tij të javëve të fundit, ai nuk sulmoi askënd, përdori fjalë të thjeshta dhe të kuptueshme nga të gjithë dhe i mëshoi tezës së njohur, se nuk është një politikan tipik. Në një moment, Kosova u shpreh se e vlerësonte integritetin e tij mbi gjithçka, madje edhe mbi partinë që e kishte kandiduar. Duhet thënë se ky ka qenë një stil fushate që me shumë gjasë do t’i japë atij më shumë vota, sesa po të ndiqte rrugën klasike të të sulmuarit.
Një rrugë të cilën e përdori mbrëmë, për fat të keq, me shumicë dhe në doza tejet të larta, kreu i opozitës Lulzim Basha, në fjalimin që mbajti pas Halim Kosovës. Të vendosur njëri pas tjetrit, dy fjalimet e Kosovës dhe Bashës ndryshonin kryekëput si nata me ditën. Kandidati demokrat etik dhe i përmbajtur, kurse kreu i PD i mbingarkuar dhe me një fjalor që do t’i shkonte Berishës së një kohe tjetër, por atij vetë.
Për një muaj rresht kandidati Kosova u kujdes që me fushatën e tij të mos ndodhte ajo që ndodhi në minutat e mitingut të Nënë Terezës. Për javë të tëra ai evitoi përplasjet, mbajti gojën dhe moderoi gjuhën me zgjedhësit dhe kundërshtarin, duke treguar integritet dhe qytetari. Pikërisht vlerat që Lulzim Basha nuk arriti t’i tregojë në fjalimin e tij inatçor në mbyllje të fushatës elektorale. Sjellja e Bashës është de facto hedhja poshtë e fushatës së Halim Kosovës. Si e tillë, ajo e dëmton në ditën e fundit të saj, përpjekjen njëmujore të kandidatit demokrat.
Mjeku i njohur i ka pasur kundër sondazhet e zhvilluara për votën në Tiranë. Nga shumë anë po thuhet se në kryeqytet nuk ka garë, pasi distanca mes kandidatëve kryesorë është e thellë dhe e paarritshme për Kosovën. Kjo do të verifikohet brenda pak orëve dhe është një bilanc që bëhet me shifrat në dorë. Por nga ana tjetër, ka një bilanc politik të fushatës, i cili mund të bëhet qysh tani. Halim Kosova ndoshta s’do arrijë ta mundë Erion Veliajn, pasi Tirana është një qytet i majtë, pasi katërvjeçari i Bashës ka qenë thjesht negativ, pasi kandidati opozitar u la vetëm nga partia e tij, kur u ngjizën aleancat elektorale e plot arsye të tjera. Por ama mund të thuhet me plot gojën se Halim Kosova ka fituar ndaj partisë dhe tij dhe sidomos ndaj kryetarit të tij. Mjaftonte mënyra sesi Kosova dhe Basha u sollën me mitingun e mbrëmshëm, mjaftojnë mesazhet dhe tonet që përzgjodhën të dy, për të kuptuar se Halim Kosova ka dalë qysh tani fituesi moral mbi standartin mesatar të partisë që e kandidoi.
