Gjatë pasdites së sotme, në emisionin “Ftesë në 5”, 26-vjeçari nga Indonezia foli mes humorit dhe emocioneve për arsyet që e kanë bindur të qëndrojë në Shqipëri.
Në bisedën me Bietën, Kim tha se prej 4 vitesh jeton në Tiranë, ku studion gjuhën shqipe dhe punon në universitet. Ai tregoi gjithashtu se në familjen e tij ishin 14 fëmijë dhe se vetë ishte i 8-ti.
Interpretimi i këngëve të ndryshme popullore shqiptare e ka ndihmuar atë ta përmirësojë ndjeshëm gjuhën, ndërsa performancat e tij janë vlerësuar me komplimente nga ndjekësit shqiptarë.
Kim u shpreh se këngët janë mënyra më e mirë për të mësuar shqipen dhe shtoi se ndihet shumë i lumtur që jeton në Shqipëri.
Ai foli edhe për traditat e vendit të tij, duke treguar se atje nuk mund të njohësh një vajzë pa marrë më parë lejen e prindërve të saj.
