Një skandal i madh ka tronditur komunitetin budist në Tajlandë. Policia ka arrestuar një ish-abat, i dyshuar për përvetësimin e rreth 100 milionë bahtëve, rreth 3 milionë dollarë, nga fondet e manastirit të tij. Bashkë me të është arrestuar edhe një grua, e dyshuar si bashkëpunëtore.
Phra Wachirayan Wi, 66 vjeç, ish-abat i në Ayutthaya, dyshohet se ka përvetësuar donacione të destinuara për tempullin në më shumë se 20 raste, gjatë një periudhe dyvjeçare.
Sipas policisë, hetimi zbuloi dy rrjedha parash të lidhura me mandatet e donacioneve që ish-abati kishte lëshuar në emër të tempullit. Njëra lidhej me fondet për rikonstruksionin e manastirit, ndërsa tjetra me pagesat për amulete dhe objekte të tjera të shenjta.
“Paratë nga të dyja këto rrjedha nuk hynë në llogarinë e tempullit. Asnjë baht i vetëm”, deklaroi hetuesi kryesor Pattanasak Bupphasuwan, sipas raportimeve të mediave tajlandeze.
Gjatë kontrollit të banesës së ish-abatit, policia gjeti para cash, shufra ari dhe sende të tjera me vlerë, ndërsa hetuesit vijuan për orë të tëra numërimin dhe dokumentimin e pasurisë së sekuestruar.
Hetimi nuk u kufizua vetëm te financat.
Teksa shqyrtonin pamjet e kamerave të sigurisë në banesën e Phra Wachirayan, policia zbuloi edhe një video ku ai shfaqej duke kryer marrëdhënie seksuale me një grua mbi tryezën e ngrënies.
Gruaja është identifikuar si 47-vjeçarja Punyavee Rungrueang, e cila gjithashtu është arrestuar. Ajo dyshohet se e ka ndihmuar ish-abatin në administrimin e parave të përvetësuara.
Sipas hetuesve, dhjetëra milionë baht qarkullonin çdo vit përmes llogarive bankare të gruas.
Nga banesa e saj policia sekuestroi 35 amulete prej ari, rreth 1.5 kilogramë shufra ari dhe bizhuteri, me një vlerë të përllogaritur prej rreth 6.04 milionë baht.
Në Tajlandë, murgjit budistë betohen për beqari dhe heqin dorë nga pasuritë materiale. Pas arrestimit, Phra Wachirayan u përjashtua nga urdhri monastik.
Ai ishte i njohur për krijimin e medalioneve dhe amuleteve budiste, të cilat kishin fituar popullaritet të madh. Sipas raportimeve, edhe kryeministri tajlandez Anutin Charnvirakul zotëron disa prej krijimeve të tij.
Deri tani, ish-abati nuk ka bërë ndonjë koment publik për akuzat ndaj tij.
Arrestimet e fundit vijnë pak më shumë se një vit pas një tjetër skandali të madh seksual dhe financiar që përfshiu disa murgj të rangut të lartë në Tajlandë.
Në korrik të vitit të kaluar, policia krijoi një linjë telefonike ku qytetarët mund të raportonin raste të “murgjve që silleshin keq”, pasi të paktën nëntë murgj u zbuluan se kishin kryer marrëdhënie seksuale me të njëjtën grua.
Më pas, gruaja i shantazhoi duke përdorur fotografi dhe video të marrëdhënieve seksuale, duke kërkuar në total afro 12 milionë dollarë.
Institucioni budist në Tajlandë është përballur prej kohësh me raste ku murgj janë akuzuar për shkeljen e betimit të beqarisë, përdorim ose trafikim droge dhe krime financiare.
Hetuesit thonë se në rastin e Phra Wachirayan hetimi nisi në mesin e korrikut, pas një denoncimi anonim ku ai akuzohej për sjellje të pahijshme dhe keqpërdorim të fondeve të tempullit.
Policia nuk përjashton mundësinë që në skemë të jenë përfshirë edhe dy ose tre persona të tjerë.
