Manchester City me një pamje krejt tjetër. Pep Guardiola ka projektuar formacionin e “Citizens” pas emërimit në postin e menaxherit, në fund të këtij sezoni. Pep Guardiola në Manchester City, ky është lajmi më i madh i këtij viti. Trajneri i mirënjohur do të largohet nga Bayern Munich pas përfundimit të këtij sezoni.
Dhe, “Citizens” kanë arritur marrëveshje trevjeçare për angazhimin e tij në postin e pasardhësit të Manuel Pellegrinit. Së bashku me Guardiolën, Manchester City do të bëjë ndryshime të mëdha në përbërjen e ekipit. E përditshmja britanike “The Guardian” ka parashikuar se Guardiola do të shpenzojë rreth 200 milionë euro në përforcime. Në mesin e blerjeve të reja në Etihad mund të jenë futbollistë të ish skuadrave të Guardiolës si Douglas Costa nga Bayern Munich ose Lionel Messi e Neymar nga Barcelona.
Por, sigurisht se do të ketë edhe largime. Madje, në mesin e tyre mund të jetë një eksod i vërtetë derisa strategu spanjoll e planifikon rindërtimin e ekipit për një periudhë më afatgjatë. Hart, Toure, Kolarov, Cliché, De Michelis, Mangala, Sagna, Nasri, Fernandinho, e disa të tjerë konsiderohen si ata që mund të sakrifikohen nga Guardiola.
Përforcimet nuk do të jenë të lehta sidomos kur merret parasysh rëndësia e futbollistëve si Messi, Neymar e Douglas në skuadrat përkatëse. Në formacionin e projektuar nga “The Guardian” se si mund të duket Manchester City nën drejtimin e Guardiolës, gjendet vetëm një mbrojtës nga ekipi i tanishëm. Në fakt, një ndryshim parashihet të bëhet edhe në portë. Guardiola thuhet se është i interesuar të transferojë portierin Claudio Bravo nga Barcelona. Kurse, në krahun e majtë do të bëjë përpjekje për blerjen e yllit të Bayern Munichut, David Alaba. Në qendër, dy mbrojtës të rinj si Aymeric Laporte nga Athletic Bilbao dhe John Stones nga Everton. Kurse, në krahun e djathtë, Pablo Zabaleta.
Super përforcime
Në mesfushë, po ashtu parashihen dy përforcime të mëdha. Marco Verratti nga Paris Saint-Germain është futbollist të cilin Guardiola e sheh si ideator të lojës së “Citizens”. Ndërsa, në krahun e tij të djathtë mund të mbërrijë mesfushori i Juventusit, Paul Pogba, futbollist i kërkuar edhe nga Real Madrid e Barcelona. David Silva do ta kompletonte mesfushën para treshes së sulmit të përbërë nga Kevin de Bruyne, Raheem Sterling dhe në qendër, Sergio Aguero.
