Ndërsa në Bulevardin “Dëshmorët e Kombit” po vijnë protestues të Partisë Demokratike, deputetja Jorida Tabaku ka dhënë një intervistë të drejtpërdrejtë për emisionin “Tema e Ditës” në RTSH. Gjatë bisedës me gazetaren Bruna Qeva, Tabaku u shpreh se kjo valë protestash është një përgjigje e natyrshme ndaj asaj që ajo e cilësoi si “përqendrim pushteti dhe korrupsion galopant”.
Sipas deputetes demokrate, sheshi nuk i përket vetëm anëtarësisë së PD-së, por çdo qytetari që ndihet i vjedhur nga modeli aktual i qeverisjes.
“Nuk ka shqiptar që nuk e ka parasysh këtë model qeverisjeje të korruptuar. Na takon ne të japim modelin tonë dhe të krijojmë frymën,” u shpreh Tabaku, duke shtuar se protestat po shërbejnë edhe si një proces rigjallërimi për bazën e partisë.
Beteja në dy fronte, shesh dhe Parlament
Tabaku pranoi se brenda Partisë Demokratike ka diskutime të vazhdueshme mbi efikasitetin e formave të protestës pas 13 vitesh në opozitë. Ajo theksoi se strategjia e PD-së do të jetë e dyfishtë:
Në rrugë, me qëndresë qytetare dhe forma të reja të reagimit dhe në institucione, me alternativa ligjore dhe betejë parlamentare, duke synuar ardhjen në pushtet përmes rrugëve institucionale.
Integrimi në “udhëkryq”
Një pikë kyçe e deklaratës së saj ishte procesi i integrimit evropian, të cilin ajo e quajti “dështimin më të madh” të qeverisë aktuale. “Kemi një Komision Evropian që ka mbështetje të madhe për integrimin, por qeveria me arrogancë sfidon si BE-në, ashtu edhe Gjykatën Kushtetuese. Kjo na ka lënë në një udhëkryq të rrezikshëm,” deklaroi Tabaku.
Në përfundim, deputetja dha një për punonjësit e shtetit. Ndërsa shprehu respekt për ata që punojnë me ndershmëri, ajo lëshoi një paralajmërim për ata që shkelin ligjin në emër të pushtetit: “Do të ketë përballje me ligjin për këdo që abuzon me detyrën.”
