Aeroporti i Rinasit është përfshirë nga një alarm, ndërkohë që NATO ka ngritur avionët luftarakë për të qenë të gatshëm për çdo sulm.
Lajmi është konfirmuar nga mediat greke, ndërkohë që askush në Shqipëri nuk ka dhënë detaje rreth kësaj ngjarje.
Shkak për këtë alarm është bërë një avion me 140 pasagjerë në bord që ishte nisur nga Franca për në Kuvajt dhe që kishte humbur kontaktet sapo kishte kaluar Kroacinë.
Sipas kanalit grek Alpha thirrjet e kullave nga Roma e Athina në drejtim të avionit kishin qenë të shumta, por askush nuk ishte përgjigjur. Duke qenë se pilotët e avionit nuk përgjigjeshin autoritetet meduan se ai mund të ishte rrëmbyer.
Kjo ka bërë që autoritetet italiane të hyjnë në komunikim me Shqipërinë, ku i ka kërkuar Rinasit që të kontaktojë me avionin, por askush nuk i është përgjigjur dhe për këtë janë njoftuar kryeministrat e Greqisë e Italisë çka ka vënë në alarm edhe Shqipërinë.
Duke u nisur nga frika se avioni mund të ishte rrëmbyer dhe mund të godiste Vatikanin, NATO vendosi që ta shoqëronte atë, ndërkohë që Rinasi ishte vënë në gatishmëri të plotë.
Brukseli zyrtar kishte lënë një linjë të hapur komunikimi, ndërsa Greqia kishte ngritur në fluturim dy avionë F-16, që i ishin vënë pas avionit me 140 pasagjerë ndërkohë që ministrja e Mbrojtjes Mimi Kodheli ka qenë në linjë me partnerët e NATO-s, pasi dyshohej për avion të rrëmbyer apo për mundësi goditje nga avioni, që udhëtonte mbi Shqipëri.
Pas kësaj, avionët e NATO-s kanë shoqëruar avionin me pasagjerë i cili nuk kishte komunikim, ndërkohë që më pas u vërtetua se dy pilotët nuk kishin komunikuar pasi i kishte zënë gjumi dhe avioni ishte drejtuar nga piloti automatik.
Shqiptarja.com/d.i.
