Shtatë zyrtarë të sistemit të drejtësisë kanë dhënë dorëheqjen, duke u larguar nga detyrat e tyre para nisjes së zbatimit të vetingut. Burime nga Presidenca bënë me dije se pranë këtij institucioni janë dorëzuar dorëheqjet nga një prokuror, tre gjyqtarë dhe tre ndihmës e këshilltarë ligjorë.
Prokurori i vetëm i dorëhequr është Sulejman Tola, i Prokurorisë së Rrethit Krujë. Ai dha dorëheqjen nga detyra në fillim të vitit 2017, në momentin e dorëzimit të formularëve të vetëdeklarimit në ILDKPKI, duke qenë se për pak muaj dilte në pension. Ndërkohë, gjyqtarët janë: Ilir Çeliku i Gjykatës së Apelit Vlorë, Ilir Pashaj i Gjykatës së Shkallës së Parë Elbasan dhe Mirela Fana, gjyqtare pranë Gjykatës së Lartë.
Po kështu, gjatë kësaj kohe, nga Gjykata e Lartë kanë dhënë dorëheqjen edhe dy këshilltarët ligjorë: Eritan Shehu dhe Adnand Berdica, si dhe ndihmësja ligjore Etleva Sherifi. Bazuar në nenin 56 të ligjit të rivlerësimit, gjyqtarët dhe prokurorët mund të jepnin dorëheqjen brenda tre muajve pas hyrjes në fuqi të ligjit, afat i cili ka përfunduar.
Këta persona të dorëhequr u mendua se i shpëtonin vetingut, përfshirë edhe hetimit pasuror, profesional dhe të lidhjeve me krimin. Mirëpo, një gjë e tillë nuk qëndron, pasi nëse kanë kryer vepër penale me fshehjen apo mosdeklarimin e pasurisë së tyre, ata do të ndiqen penalisht.
Procedurat e vetingut kanë nisur ndërkohë për rreth 800 gjyqtarë e prokurorë, ndërsa dorëheqjet nuk lejohen më sipas ligjit. Të gjithë funksionarët e drejtësisë tashmë do t’i nënshtrohen procesit të rivlerësimit pa të drejtë dorëheqjeje gjatë procesit. Ka qenë kjo pikë e ligjit të cilën Unioni i Gjyqtarëve e ka ankimuar në Gjykatën Kushtetuese, duke kërkuar që e drejta e dorëheqjes të jetë në çdo moment.
DOREHEQJET
Sulejman Tola, prokuror, Krujë
Ilir Çeliku, gjyqtar Apeli, Vlorë
Ilir Pashaj, gjyqtar, Elbasan
Mirela Fana, Gjykata e Lartë
Eritan Shehu, këshilltar ligjor, Gjykata e lartë
Adnand Berdica, këshilltare ligjore, Gjykata e Lartë
Etleva Sherifi, ndihmëse ligjore, Gjykata e Lartë
