Oligarku rus, Roman Abramovich, zotëron ose është i lidhur me një koleksion prej pesë jahtesh të vlerësuara pothuajse 1 miliard dollarë.
Këtu përfshihen disa anije, pronësia e të cilave mbeti e fshehtë deri këtë javë.
Një hetim i prestigjiozes “Financial Times” mbi pasuritë e miliarderit ka hequr velin e fshehtësisë që ai ruan mbi pasurinë e tij, edhe pasi Britania e Madhe dhe Bashkimi Evropian vendosën sanksione.
Autoritetet në Mbretërinë e Bashkuar dhe BE po përpiqen të identifikojnë të gjitha asetet në pronësi të oligarkëve të sanksionuar.
Abramovich tashmë u raportua gjerësisht se ishte pronar i Solaris dhe Eclipse – me vlerë 474 milionë dollarë dhe 437 milionë dollarë.
Por FT-ja zbuloi këtë javë se ai zotëron gjithashtu Halo dhe Garçon, të cilat të dyja janë ankoruar në Antigua.
Qeveria e Antiguanit nuk ishte në dijeni të pronësisë së anijeve të ankoruara në ishull – përpara hetimeve nga FT – duke nënvizuar shkallën e sfidës me të cilën përballen autoritetet për zbatimin e sanksioneve.
Tom Keatinge, drejtor i Qendrës për Krimin Financiar dhe Studimet e Sigurisë në Institutin e Shërbimeve të Bashkuara tha se, qeveritë, bankat dhe institucionet e tjera që përpiqen të zbatojnë sanksionet duhet të lundrojnë në një botë ku “gjurmët e pronësisë janë të ftohta dhe shndërrohen në një mjegull”.
Halo dhe Garçon vlerësohen respektivisht në 38 milionë dollarë dhe 20 milionë dollarë dhe tani rrezikohen të sekuestrohen.
Në një letër drejtuar komisionerit të lartë britanik në Barbados në lidhje me jahtet, ministri antiguan i Punëve të Jashtme, Paul Chet Greene tha se, ishulli do t’i “sigurojë ndihmë të plotë qeverisë së Mbretërisë së Bashkuar” nëse merr një kërkesë sipas Ligjit të ndërsjellë të dy vendeve.
Letra vinte në dukje se Antigua kishte kërkuar informacion mbi kompaninë që zotëron dy varkat.
Në përgjigje, komisioni i lartë britanik u dha autoriteteve të Antiguanit një letër, të parë nga FT-ja, “nga Agjencia e Hetimit Financiar të Ishujve të Virgjër Britanikë, e cila thotë se pronari përfitues i Ëenham Overseas Ltd është Roman Abramovich”.
Letra gjithashtu tregon se adresa e miliarderit në Zvicër është renditur thjesht si “Immeuble, Gatzby Le Magnifique”, që përkthehet si “Ndërtesa e Madhe e Gatsbit”.
Keatinge e përshkroi aftësinë e Mbretërisë së Bashkuar për të kërkuar informacion të plotë të pronësisë së kompanive të regjistruara në ndonjë nga territoret e saj jashtë shtetit ose varësitë e kurorës si “arma e saj më e fuqishme globale” në luftën kundër sekretit financiar.
Megjithatë, ai ngre pyetje se “sa është duke u përdorur ajo armë”?
Një person me njohuri për koleksionin e varkave të Abramovich dhe tregon se oligarku gjithashtu mund të jetë ende pronar i Sussurro, jahtit të parë që bleu në 1998, pavarësisht raporteve se ai ia kishte dhënë një ish-gruaje në një divorc.
Personi që identifikoi saktë dy jahtet në Antigua se i përkisnin Abramovich tha për FT-të se oligarku ende zotëronte Sussurro.
Pronari i anijes është i shënuar në regjistrat detarë si Vesuvius International Limited në Ishujt e Virgjër Britanikë.
Dokumentet e BVI-së tregojnë se kjo kompani ishte çregjistruar atje në 2017.
Një tjetër Vesuvius International u regjistrua në Jersey po atë vit.
Pronari i Vesuvius International me bazë në Jersey është renditur si Wotton Overseas Holdings Limited.
Ky ent – i cili u zhvendos nga BVI në Jersey në 2017 – është gjithashtu pronar përmes një filiali të një helikopteri që është fotografuar duke u ulur në Solaris të Abramovich disa herë.
Shërbimet e gjurmimit detar tregojnë se Sussurro, që do të thotë “pëshpëritje” në italisht dhe vlerësohet në 11 milionë dollarë, është ankoruar në La Ciotat në jug të Francës – i njëjti port ku qeveria franceze muajin e kaluar sekuestroi një superjaht 116 milionë dollarësh që i përkiste një kompanie të lidhur, me Igor Sechin, kreun e grupit rus të naftës Rosneft.
Kompania e menaxhimit të Sussurro është Blue Ocean Management, një kompani me bazë në Qipro që menaxhon gjithashtu Le Grand Bleu, një superjaht 113 metra që Abramovich thuhet se ia ka dhënë bashkëpunëtorit të tij të biznesit Eugene Shvidler.
Mbretëria e Bashkuar e vendosi Shvidlerin nën sanksione javën e kaluar.
Letra nga agjencia e hetimit financiar të BVI-së drejtuar homologëve të saj britanikë zbulon gjithashtu se pronari i Le Grand Blue – Ashchurch Holdings Limited – është në pronësi të “Zarui Shvidler”.
Gruaja e Shvidlerit njihet zakonisht si Zara Shvidler.
g.kosovari
