Shqipëria vijon të tërheq vëmendjen e mediave ndërkombëtare. E njohur tashmë si një nga perlat e fshehura të Ballkanit, ajo renditet mes destinacioneve më të mira ekonomike në botë për këtë vit.
Sipas një artikulli të publikuar në median kanadeze të udhëtimeve “Milesopedia” nga autorja Marie-Ève Leclerc, ekspertja e udhëtimeve dhe nomade digjitale, vendi ynë ofron një raport të shkëlqyer mes kostos dhe cilësisë, duke joshur vizitorët nga larg.
Nga kryeqyteti i gjallë i Tiranës, te ekskursionet fantastike në liqenin e Bovillës dhe qytetet e mbrojtura nga UNESCO si Berati e Butrinti, Shqipëria ofron gjithçka.
Riviera jonë, nga Vlora deri në Sarandë, me plazhet e Ksamilit dhe Dhërmiut, mbetet një zgjedhje e preferuar, ndërsa në veri, alpet e Thethit dhe ujëvarat e Grunasit po shndërrohen në parajsën e aventurierëve të natyrës.
Ajo që e bën Shqipërinë edhe më të parezistueshme janë çmimet. Sipas artikullit buxheti ditor është ekonomik: akomodimi varion nga 25 në 60 dollarë, ushqimet tradicionale kushtojnë vetëm 10 deri në 20 dollarë, ndërsa qiraja e makinës apo ekskursionet ofrohen me tarifa shumë të përballueshme për turistët e huaj.
Media kanadeze thekson gjithashtu lehtësinë e fluturimeve përmes linjave ajrore ndërkombëtare, duke e kthyer Shqipërinë në një nga alternativat më të zgjuara për pushime të paharrueshme pa shpenzuar shumë.
