Shtetet e Bashkuara i kanë kërkuar zyrtarisht Rusisë më shumë informacion për vdekjen e një teknike laboratori në një institut kërkimor për murtajën, në rajonin e Irkutskut, në Siberi.
Sipas mediave ruse, 28-vjeçarja Darya Shipilova mund të jetë infektuar me murtajë pulmonare pasi një epruvetë u thye në laborator. Në këto raportime thuhej gjithashtu se deri në 200 persona që mund të kishin pasur kontakt me të ishin vendosur në karantinë.
Autoritetet ruse i kanë mohuar këto pretendime.
Mbikëqyrësi shëndetësor Rospotrebnadzor tha se dokumentet që qarkullojnë në internet për marrjen e masave të veçanta kundër murtajës nuk janë zyrtare dhe se informacioni i publikuar është i pavërtetë.
Edhe guvernatori i Irkutskut ka mohuar se bëhet fjalë për murtajë. Ai tha se gruaja kishte vdekur nga pneumonia, ndërsa shkaku përfundimtar i vdekjes ende nuk është përcaktuar. Sipas autoriteteve, analizat e kryera pas vdekjes nuk kanë treguar shenja të murtajës apo të mikroorganizmave që mund të lidhen me punën e saj në laborator.
Megjithatë, çështja ka tërhequr vëmendjen e autoriteteve amerikane dhe ndërkombëtare. Sekretari amerikan i Shtetit, Marco Rubio, si dhe Organizata Botërore e Shëndetësisë, i kanë kërkuar Rusisë më shumë informacion dhe transparencë për rastin.
Presidenti amerikan Donald Trump tha se do të flasë së shpejti me Vladimir Putinin për këtë çështje. Ai tha se SHBA-të po e shqyrtojnë situatën nga afër dhe se mund të ketë më shumë të dhëna në ditët në vijim.
OBSH tha se Rusia e kishte njoftuar se në rajonin e Irkutskut nuk ishte regjistruar asnjë rast i murtajës. Megjithatë, drejtori i organizatës, Tedros Adhanom Ghebreyesus, kërkoi më shumë informacion për rastin e pneumonisë.
Murtaja është një sëmundje bakteriale që shfaqet në disa forma. Forma pulmonare është veçanërisht e rrezikshme dhe mund të përhapet nga një person te tjetri përmes rrugëve të frymëmarrjes.
Ndërkohë, më 21 dhe 22 tetor në Irkutsk pritet të zhvillohet një konferencë ndërkombëtare për murtajën dhe sëmundjet infektive. Organizatorët kanë sqaruar se konferenca nuk ka lidhje me vdekjen e punonjëses së laboratorit.
