“Demokratë a jeni gjallë?”, Ylli Manjani i bashkohet Berishës: Ai s’është më doktori i zemrës, por i shpirtit tonë!

Ish-ministri i Drejtësisë nga radhët e LSI-së, Ylli Manjani, ka marrë pjesë në protestën e thirrur nga Sali Berisha përballë Kryeministrisë.

Gjatë fjalës së tij, duke folur për vizitën e Presidentit serb Vuçiç në Shqipëri dhe darkës së tij me Kryeministrin Rama, Manjani tha se “po hanë trutë e peshkut për të na shitur trutë e gomarit”.

“Demokratë jeni gjallë apo jo? Faleminderit për ftesën. Nuk kam ardhur për qokë, as për patriotizëm sepse ne nuk jemi patriotë, jemi shqiptarë dhe kjo është shumë më e rëndësishme. Sonte në Shqipëri na kanë ardhur mysafirë dhe bashkë me të zotin tonë të shtëpisë po hanë trutë e peshkut për të na shitur trutë e gomarit por kjo nuk shkon. Me trutë e gomarit nuk shkon as Shqipëria, as Serbia dhe as Maqedonia. Kjo është histori gomerësh. Përulem para jush me një respekt të thellë, për një proces të jashtëzakonshëm, demokratik. Ju i keni dhënë Shqipërisë një model që nuk e kishte parë, ju u vetëorganizuat. Demokracia në Shqipëri ka dy armiq, janë faqezinjtë dhe kapuçzinjtë. Për kapuçzinjtë kam një ftesë, shkoni në shtëpi se ju presin fëmijët, mos i bëni me turp sepse nuk e ndalni dot vullnetin e anëtarësisë”.

Në përfundim të fjalës së tij, Manjani ia la foltoren Sali Berishës duke u shprehur se “Ky bulevard s’ka më nevojë për doktorin e zemrës, por atë të shpirtit”.

/a.r