Nënkryetari i BDI-së, Bujar Osmani, në një intervistë për Klan News me gazetaren Enita Mema, ka akuzuar partitë shqiptare në Maqedoninë e Veriut për shkelje të marrëveshjes së arritur para zgjedhjeve, që kishte në thelb angazhimin për integrimin europian të vendit.
“Para zgjedhjeve, partitë shqiptare kishin nënshkruar një dokument, ku angazhoheshin se pas zgjedhjeve nuk do të bënin koalicion me cilëndo parti që nuk deklarohej qartë se do të vijonte rrugën e integrimit drejt Bashkimit Europian. Për fat të keq, disa nga nënshkruesit e këtij dokumenti janë bërë pjesë e një qeverie që nuk ka asnjë kalendar për integrimin dhe që po saboton aktivisht rrugën europiane të vendit,” u shpreh Osmani.
Deklarata e tij vjen në një kohë të ndjeshme politike, pasi qeveria e re në Shkup është përballur me kritika për mungesë transparence dhe angazhimi në procesin e afrimit me BE-në.
Ai paralajmëroi se me këto zhvillime rrezikohet seriozisht edhe Marrëveshja e Ohrit, që garanton barazinë dhe përfaqësimin e shqiptarëve në institucionet shtetërore.
“Vitet e fundit, në çdo institucion shqiptarët janë shndërruar në zero, punësimet janë 50/0, 30/0, 20/0, jo vetëm në Shkup, por edhe në qytetet ku shqiptarët janë shumicë. Të dhënat e fundit flasin për rënie prej 2% të përfaqësimit brenda një viti, që krijon një hendek prej 4 mijë ose 5 mijë vende pune, ku është rritur punësimi maqedonas karshi shqiptarëve,” shtoi Osmani.
