Këngëtarja e njohur Aurela Gaçe ka reaguar publikisht me një deklaratë të fortë pas aludimeve që përfshijnë emrin e saj në skandalin e shantazheve me video intime që ka tronditur opinionin publik.
Përmes një mesazhi në rrjetet sociale, artistja hodhi poshtë çdo pretendim duke sqaruar se bashkëpunimet e saj muzikore kanë qenë ekskluzivisht marrëdhënie profesionale. Gaçe theksoi se dinjiteti i saj si bijë, nënë dhe bashkëshorte nuk mund të kthehet në objekt përbaltjeje apo argëtimi publik, ndërsa konfirmoi nisjen e hapave ligjorë ndaj çdo shpifjeje.
Deklarata e plotë e Aurela Gaçes:
“Përshëndetje! Ditët e fundit po shoh emrin tim të përfshihet në lajme e aludime të pabazuara. Përballë shpifjeve që cenojnë dinjitetin tim, nuk mund të hesht.
Bashkëpunimet e mia muzikore me autorë të kësaj industrie janë marrëdhënie profesionale. Ato nuk i japin askujt të drejtën të sajojë histori për jetën time apo ta përdorë emrin tim për të nxitur thashetheme.
Dua të jem e qartë: Nuk jam pjesë e asnjë videoje të natyrës që po aludohet. Çdo pretendim që më lidh me të tilla përmbajtje është i pavërtetë.
Jam bijë, nënë dhe bashkëshorte. Dinjiteti i askujt nuk duhet të bëhet objekt përbaltjeje apo argëtimi publik. Dinjitetin tim e kam shumë të shtrenjtë dhe nuk lejoj askënd ta përdhosë. Edhe një herë! NUK LEJOJ ASNJË TË MË PËRBALTË.
Nuk marr përsipër të gjykoj jetën private të të tjerëve. Jam në krah të çdo vajze e gruaje që përballet me shpifje, poshtërim apo cenim të privatësisë.
Nuk do të toleroj përdorimin e emrit tim në histori të sajuara. Për çdo shpifje që cenon emrin dhe dinjitetin tim, do të ndërmarr hapat e nevojshëm ligjorë. Liria e fjalës nuk është liri për të shpifur.”
