Kryeministri Edi Rama, mori pjesë mbrëmjen e së enjtes në mbledhjen e këshillit bashkiak të Tiranës, që u mblodh për të mbështetur financiarisht qiratë njëvjeçare 100% për familjet që nuk kthehen dot në banesat e tyre, për shkak të dëmeve të shkaktuara nga tërmeti i 26 nëntorit.
Duke marrë fjalën, Rama tha se për familjet e prekura nga tërmeti është gati edhe skema e riparimeve për godinat e padëmtuara në strukturë.
“Erdha për të shfrytëzuar këtë mbledhje të këshillit bashkiak edhe për faktin që me ndihmën e qeverisë, këshilli juaj sot mund të miratojë për 554 familjet e para që janë të prekura drejtpërdrejt dhe nuk mund të kthehen në shtëpitë e tyre në një skemë që e kemi dakordësuar me kryetarin e bashkisë dhe do ta aplikojmë edhe në bashkitë e tjera ku ka problematikë të ngjashme me perimetrin e gjendjes së emergjencë së fatkeqësisë natyre, që janë për një vit. Pra me këtë masë, që tani 60% e familjeve të pastreha, për shkak të tërmetit mund të futen në shtëpi të re. Pra, qiraja mbulohet 100 nga ne. Ndërkohë më vjen mirë që do kalojë procedura e veçantë për riparimet në mënyrë që lejet e riparimeve të kenë procedurë të përshpejtuar. Çdo projekt i meremetimeve të garantohet jo nga një por nga tre inxhinierë të lincecuar, në mënyrë që bashkia ta japë lejen e meremetimit brenda 24 orësh mundësisht për vetë firmat sepse janë ato që duhet t’i bëjnë.”-tha Rama.
Kryeministri u shpreh se, “Këshilli do të kalojë sot edhe procedurën e veçantë për riparimet. Pra në mënyrë që lejet e riparimeve të kenë një procedurë të përshpejtuar dhe çdo projekt i meremetimeve të garantohet jo nga një por nga tre inxhinierë të licencuar, në mënyrë që bashkia ta japë lejen brenda 24 orëve, për vetë firmat sepse janë ato që duhet të bëjnë meremetimin, firmat që kanë ndërtuar. Shpresoj që të gjithë ta kuptojnë qartë, që të kthejnë mbrapsht të gjithë atyre që ju kanë shitur apartamente, që u janë dëmtuar. Ndërkohë që bëhet fjalë vetëm për godina që nuk kanë dëmtime strukturore”.
Duke iu referuar bilancit të dëmeve të tërmetit në banesa, në zonat Tiranë, Durrës, Kurbin e Lezhë, Rama tha se “godinat e reja nuk kanë dëmtime strukturore”. “Pra e gjithë ajo farsa e organizuar me instinktin e kudondodhur të vrasjes së çdo lloj burimi energjie pozitive nga mediat, praktikisht po çmontohet çdo ditë nga e vërteta. Të gjitha historitë e kënduara e të stërkënduara mbi godinat e reja të larta që kanë rrezikuar jetën e njerëzve, që rrezikuan të shemben etj., etj., nuk qëndrojnë dhe kjo është një gjë shumë pozitive, sepse godinat kanë mbajtur më së mirë goditjen dhe duke iu referuar projektit të tyre, janë godina të projektuar me struktura që mbajnë edhe tërmete më të forta”, – tha Rama.
Rama bëri të ditur se ka filluar puna për ndërtimin e tri lagjeve të reja në Tiranë, një në Kombinat, një në zonën 5 Maji dhe një në zonën e ish-uzinës së Autotraktorëve.
“Po punojmë me kryetarin e bashkisë për modelet më të mira financiare dhe së bashku me një grup ekspertësh kanë nisur punën për hartimin e një ligji të veçantë lidhur me perimetrin e emergjencës që të kemi fleksibilitetet në procedura dhe procesin e rindërtimit”, – sqaroi ai.
Rama ka folur edhe për prishjen e godinave tek Qyteti Studenti duke thënë se pas një zaptimi 30-vjeçar ato godina do të prishen. Ndërkohë që ka shtuar se familjet që ishin aty do të përfshihen gjithashtu në skemat e qirasë 100%.
“Këto familje nuk do të hidhen në rrugë. Do të marrin qira si gjithë të tjerët. Pas një zaptimit 30-vjeçar, ato konvikte do të prishen. 30 vjet është boll, do lënë dhomën në Qytetin e Studentit për të marrë një apartament në qytet. Ato 3 konvikte do të prishen. Në Qytetin Studenti do të ndërtohet Kampusi universitar. Mos të krijojnë iluzione nga ata që s’dinë të bëjnë gjë tjetër. Ne nuk tërhiqemi para nevojës për zhvillim. Më vjen mirë që procesi i zbukurimit të qytetit në prag të festave ka ecur, duhet bërë kështu edhe në Durrës, Krujë, e kudo, sepse nevoja për normalitet është e domosdoshme për ata që janë të traumatizuar, dhe mërzia dhe zymtësia nuk ndihmon. Kopshtet kanë filluar t’i kthehen normalitetit edhe shkollat po ashtu. Të hënën fillon edhe shkolla në Tiranë, bashkia t’i qëndrojë pranë nxënësve. Kurajo, energji, forcë, se është një moment i një krize të madhe, që ka në përmbajtjen e vet një mundësi për të gjithë, për të dalë më të fortë, dhe që të gjithë ata që humbën shtëpinë, kur të kthehen në normalitet, të kthehen në kornizë të jetuari me standarde më të mira se ato që kishin”, – tha Rama.
