Nënkryetari i Partisë Demokratike Enkelejd Alibeaj ka marrë drejtimin e degës së Partisë Demokratike në Vlorë. Burime për Panorama.al bëjnë me dije se Alibeaj do të drejtojë si i komanduar degën e PD-së në Vlorë, pas shkarkimit të Genc Deromenaj, i pozicionuar në krah të ish-kryeministrit Berisha.
Me herët gjatë ditës ndryshime pati dhe në degën e Partisë Demokratike në Korçë, ku pas shkarkimit të Edmond Spahos nga nga funksionet partiake, kryetari i Partisë Demokratike, Lulzim Basha zgjodhi deputetin Ervin Salianji si drejtuesin politik të qarkut.
Kujtojmë se Gazeta Panorama.al zbardhi mesazhin e sekretarit të Përgjithshëm të PD-së, Gazment Bardhi, i cili njoftoi mëngjesin e sotëm se Salianji do të marrë postin drejtues që mbante Edmond Spaho.
“Pas vendimit të Kryesisë së Partisë për përjashtimin nga Partia Demokratike të ish-drejtuesit politik të qarkut Korçë, z. Edmond Spaho, ju njoftoj se: Në mbështetje të nenit 33 të Statutit të Partisë, sot Kryetari i Partisë ka caktuar si Drejtues Politik të qarkut Korçë, deputetin z. Ervin Salianji.
Në këtë mënyrë z. Salianji do të jetë edhe Kryetar i Këshillit Koordinues të Qarkut, që është struktura e përhershme me përgjegjësi në organizimin elektoral dhe aksionet e veprimtaritë politike të PDSH në nivel qarku”, thuhet në mesazhin e Bardhit./m.j
