Banda e grabitësve u zbulua nga iPad–i
Një iPad i vjedhur në një prej vilave në zonë e Farkës bëri që policia të arrestonte tre grabitës, që prej disa muajsh ishin kthyer në terrorin e banorëve. Pajisja teknologjike ishte vjedhur disa javë më parë. Burime nga policia e Tiranës bëjnë me dije se një nga autorët e vjedhjeve kishte mbajtur për përdorim personal këtë pajisje.
Pas denoncimit të pronarit policia vuri nën përgjim iPad-in. Pas përgjimit disa javor dhe metodave të tjera speciale të hetimit, policia arriti të dokumentonte veprimatrinë kriminale të Ardian Suti, Armend Krosi dhe Durim Rama.
Të tre këta persona u arrestuan ditën e hënë nga efektivët e komisaritit numër 1. Sipas hetuesve ky grup është autor i një serie vjedhjesh të ndodhura në vilat dhe komplekset e banimit në zonën e Farkës.
Në cilësinë e provës materiale policia ka gjetur në banesat e autorëve pajisje teknologjie të fjalës së fundit si celularë apo kompjutera. Gjithashtu janë sekuestruar dhe sasi të kosniderueshme bizhuterish vjedhura në kohë dhe vende të ndryshme. Pritet që ditën e mërkurë tre personat e ndaluar të dalin para gjykatës për tu njohur me masën e sigurisë. Tre javë më parë në prangat e policisë ra dhe Rrahman Domi, edhe ky grabitës në këtë zonë të Tiranës.
