Nga Ben Andoni
Ramush Haradinaj është arrestuar pak orë më parë, fill sapo ka shkelur në aeroportin e Bazel-Mulhouse. Arsyeja ka qenë një urdhër arresti ndërkombëtar i Serbisë i vitit 2004, që është ekzekutuar nga policia franceze. Për z.Haradinaj ku është arrestimi i radhës në aeroporte të ndryshme, por që deri më tani është liruar pas ndërhyrjeve të autoriteteve kosovare dhe të huaja. Për të ardhur keq, edhe pse fletë-arrestet ndaj zyrtarëve kosovarë janë shpjeguar në të gjitha rastet, ato vazhdojnë të jenë në fuqi. Ndaj, njeriu që e ka kaluar dy herë provën e Tribunalit të Hagës për krimet e Luftës është sërish i rrezikuar.
Autoritetet kosovare në këto momente të para vetëm sa e kanë konfirmuar, por nuk dihen hapat për lirimin e tij, ndërkohë që i hidhur ka qenë sot për ironi të fatit reagimi i Presidentit Thaçi lidhur me akuzat për Gjykatën Speciale. Ai ka thënë pak a shumë se është faji i Kosovës, të cilës i janë vrarë dëshmitarët e çështjeve kundër UÇK-së, që po ngrihet autoriteti i ri i këtij Tribunali.
Ndërkohë më shqetësues është simetria e marrëdhënieve kosovare-serbe. Serbia vazhdon edhe e quan Ramush Haradinajn kriminel lufte për rolin e tij në udhëheqjen e UÇK-së në atë që ata e konsideronin si ish-provincën e tyre jugore, Kosovën. Por kjo e fundit që pas luftës dhe pasi shpalli pavarësinë më 2008 është e shkëputur krejt edhe de facto nga arsyetimet serbe. Madje verdikti i Gjykatës Ndërkombëtare i ka dhënë mbrojtje edhe me ligjet e Të Drejtës Ndërkombëtare.
Veçse në javët e fundit marrëdhëniet e dy vendeve dhe bisedimet e tyre po marrin shumë goditje nga pala serbe. Të tilla goditje si kjo e fundit, kur dihet se Ramush Haradinaj ka marrë pafajësi ndërkombëtare do rëndojnë si zakonisht ecurinë e bisedimeve bilaterale, që pas ngritjes së murit në Mitrovicë dhe pretendimit për ngritjen e Asosacionit po minojnë një punë të madhe për afrimin e pajtimit mes dy vendeve.
Nga ana tjetër, arrestimi i Ramush Haradinajt është edhe një kambanë për fillimin e punës de facto të Gjykatës Speciale, që vërtetë në këtë rast nuk ka rol, por që është futur në hulli për të kryer misionin e saj, që mëtohet se do të sjellë një trandje të vërtetë të situatës politike në Kosovë. Presidenti Thaçi vendosi ta dënojë arrestimin e kolegut të tij të luftës, ndërkohë që i duhet të vendosë shinat për një regjistër tjetër me palën serbe, që për hir të së vërtetës, po e tepron me provokimet e përsëritura të nivelit të tillë. (Javanews)
