Futbollisti i Kombëtares Rey Manaj, në një intervistë ekskluzive në emisionin “Opinion” në Tv Klan, rrëfeu mbi karrierën e tij futbollistike.
Manaj u shpreh se kur ka marrë rrogën e parë, gjënë e parë që bëri, ishte që hoqi mamanë nga puna. “Kur mora rrogën e parë si profesionist në futboll isha 16 vjeç dhe hoqa mamanë nga puna. I thashë që nuk ke nevojë që të punosh”, deklaroi ai. Manaj zbuloi se rroga e parë e tij si profesionist në futboll ka qenë 6 mijë euro në muaj.
“Më bëhet qejfi që çdo gjë shkoi mirë në eliminatore për Shqipërinë. Dhe ai gol imi kundër Serbisë ishte shumë i rëndësishëm, por më shumë u gëzova sepse morëm tre pikë në atë sfidë. Unë kam luajtur futboll kur isha 6 vjeç. Kur kam qenë 3 vjeç kam ikur me familjen në Itali. Kam ikur me gomone. Na kthyen me avion, jetonim tek shtëpia e tezes.
Kur ikëm për herë të dytë, ikëm në Romë fillimisht e më pas në Piacenza. Isha me një ekip të vogël në qytetin ku isha, më pas shkova tek klubi i futbollit Piacenza e më pas luajta në nivele më të larta. Gigi Simoni më dha një ndihmë shumë të madhe në atë kohë.
Isha 16 vjeç kur luajta si profesionist, kur më mori te Cremonese dhe për një vit shkova tek Interi. Kisha rrogën 6 mijë dhe hoqa menjëherë mamin nga puna. Në fillim nuk kisha as patentë. Nuk ishte e lehtë, sepse tek Interi kishte emra të mëdhenj. Luajta në Pescara më pas. Kudo që kam shkuar, prindërit i kisha me vete, më pas shkova në Spanjë. Më pas nga Albacete dhe shkova tek Barcelona. Janë eksperimente të vlefshme”, tha Manaj.
