Vetëm pak ditë pas mbërritjes në Angli, një shqiptar është kapur me një pistoletë elektrike (stun gun) e cila lëshonte 55 mijë volt.
Mediet vendase raportojnë se Shuaip Llapri, 27 vjeç, e kishte fshehur armën në një shtëpi në zonën Exmouth, ku ai jetonte me disa persona të tjerë. Policia e gjeti pistoletën gjatë kontrollit të banesës në muajin qershor.
I arrestuari i tha policisë se armën e gjeti në një park në Exmouth dhe kujtoi se ishte një çakmak elektrik.
Por gjykatësi Francis Gilbert, duke lexuar masën e dënimit në Exeter Crown Court, i tha shqiptarit: “Unë nuk e besoj historinë tuaj të gjetjes së armës në park, por nuk dua ta përjashtoj dyshimin e arsyeshëm për çfarë ju pretendoni”. Ai e dënoi Llaprin me 6 muaj burg e më pas dëbim për në Shqipëri.
Në Angli pistoletat elektrike konsiderohen armë të paligjshme. Pasi lëshojnë rrymë elektrike, ato paralizojnë dhe shkaktojnë gjendje shoku. Vetëm disa forca policore në vend mund ta përdorin këtë armë.
Top Channel
