Shantazhi ndaj njerëzve të drejtësisë për të cilët po flet prej 10 ditësh ambasadorja amerikane , duhet të jetë aq prezent sa e ka detyruar sërish Yuri Kim të tregojë mbështetjen e fortë të Shteteve të Bashkuara të Amerikës për gjyqtarët që përballen me korrupsionin në nivele të larta dhe krimin e organizuar.
“Ne do të qëndrojmë krah jush, do të vazhdojmë të luftojmë bashkë me ju“- ju tha Yuri Kim gjyqtarëve, pak orë mbasi publikisht të enjten dha mesazhin e qartë se presioni, shantazhi dhe telefonatat kërcënuese nuk duhet të triumfojnë.
Duket se vizita e vazhdueshme dhe mesazhet këmbëngulëse të ambasadores amerikane me trupat gjyqësore kanë lidhje me kërcënimin e një gjyqtareje të posaçme e cila u kërcënua, u shantazhua dhe u përndoq në mënyrë që të mos jepte drejtësi.
Jo vetëm ajo por edhe familjarët e saj. Nga të dhënat që TCh rezulton gjyqtarja në fjalë është shprehur me vendim. Ndërkohe që është marrë në ruajtje ajo dhe familjarët e saj, bëjnë me dije burimet e TCh.
Ambasada amerikane duket se nuk e ka në agjendë deklarimin e emrave, por mesazhet po bëhen përditë dhe më të forta në përkrahje të gjyqtarëve dhe prokurorëve.
Duket se te angazhuar me propozimet për ndryshimet kushtetuese mbi mandatin e kryetarit të SPAK dhe shqetësimin se kush do të jetë drejtuesi i ri i Prokurorisë së Posaçme, rezulton se SPAK nuk ka nisur ende hetime për kërcënimin e një gjyqtari.
Deri më tani, kërcënimi i një gjyqtari është vetëm shqetësim i ndërkombëtarëve dhe i trupave gjyqësorë. /TopChannel
