Siç thotë për “Kosova Press” hulumtuesi i Institutit për studime të luftës hibride “Octopus”, Gurakuç Kuçi, kamera është montuar nga BIA serbe. Ai pretendon se qëllimi i saj ka qenë monitorimi i lëvizjeve në një udhëkryq të rëndësishëm dhe gjetja e pozicioneve të përshtatshme për të destabilizuar më pas Kosovën me akte si ai i Banjskës.
Sipas tij, institucionet serbe kanë rënë në një pozitë jashtëzakonisht të dobët të kontrollit të Kosovës: “Institucionet e Serbisë, fatmirësisht për ne dhe fatkeqësisht për ata, kanë ra në një pozitë jashtëzakonisht të dobët të kontrollit të Kosovës, saqë më efektiviteti i kontrollit të Kosovës, përveç që nuk është siç ka qenë, ata duhet që në orët e energjisë elektrike të fshehin kamerat e tyre që të mund të kontrollojnë diçka. Ka qenë e vendosur jo rastësisht, por strategjikisht që të kontrollojë të gjitha rrugët, i ka bartur informacionet te Shërbimet e Inteligjencës së Serbisë. Kanë pasur për qëllim monitorimin dhe gjetjen e pozicioneve të përshtatshme, ku ata mund të hidhen në veprim për çështje të caktuara, po ashtu të kontrollojnë lëvizjet e organeve të Kosovës, në mënyrë që të gjejë momente të caktuara që të sulmojnë si në rastin e Banjskës”.
Gjithashtu, njohës të tjerë të çështjeve të sigurisë thanë se kamera ilegale tregon përpjekjet e vazhdueshme të Beogradit për të ndërhyrë në çështjet e brendshme të Kosovës dhe për të ruajtur ndikimin përmes mjeteve hibride. Sipas tyre, informacionet e mbledhura mund të shërbejnë për të planifikuar akte destabilizuese.
