Zyra e Shtypit të Erion Veliajt ka reaguar ndaj akzuave të bëra ditët e fundit nga PD lidhur me pretendimin e këtyre të fundit se Ajola Xoxa, ka qenë avokate e Francesco Becchettit, në çështjen që ky akuzohet për pastrim parash.
Përmes një komunikate për shtyp, theksohet se në asnjë moment Xoxa nuk ka qenë avokate apo të ketë qenë personalisht përfaqësuese ligjore për Franchesco Bechettin, apo për ndonjë prej kompanive të tij.
Siç thuhet në reagim, Xoxa ka punuar si juriste për periudhën kohore 2012-2014 pranë studios ligjore Tashko Pustina dhe se ajo ka ofruar shërbimin e saj profesional për klientët e studios, sipas kërkesës së drejtuesve të studios.
Në fund nënvizohet se nëse do të vijohet me akuza të tilla, atëherë zonja Xoxa do të ndërmarrë hapat ligjorë që të drejtat e saj të mos cënohen, duke nënkuptuar padi ndaj të tilla deklaratave.
Më poshtë reagimi i plotë:
Sa më shumë afron data e zgjedhjeve të 21 qershorit, aq më shumë është në panik Partia Demokratike. Në mungesë të programit dhe vizionit për Tiranën, të zhytur në dështimin e 4 viteve të fundit gjumë të Lulzim Bashës, e vetmja alternativë për Partinë Demokratike në këto zgjedhje është sulmi personal për familjen e Erion Veliajt, duke hedhur baltë mbi bashkëshorten e tij.
Siç e kemi sqaruar edhe më parë, Ajola Xoxa në harkun kohor 2012-2014 ka punuar si juriste e asociuar pranë studios ligjore Tashko Pustina. Ajo nuk ka patur asnjë klient të vetin dhe asnjë marrëdhënie financiare me ndonjë klient të studios. Zonja Xoxa është paguar vetëm nga studio ligjore dhe ka ofruar shërbimin e saj profesional për klientët e studios, sipas kërkesës së drejtuesve të studios.
Theksojmë se Ajola Xoxa nuk ka qenë në asnjë moment personalisht përfaqësuese ligjore për Franchesco Bechettin, apo për ndonjë prej kompanive të tij.
Nëse media të caktuara apo deputetë të opozitës do të vazhdojnë këtë sulm shpifjesh dhe fyrjesh ndaj znj. Ajola Xoxa, ajo do të ndërmarrë të gjitha veprimet ligjore për të rivendosur të drejtat e saj të cenuara, duke kërkuar që shkelësit të mbajnë përgjegjësi përpara ligjit!
Kandidati i ASHE për Tiranën Erion Veliaj mbështet luftën pa kompromis ndaj evazionit fiskal dhe pastrimit të parave, si edhe principin se një media nuk mund të jetë e lirë dhe e ndershme kur financohet nga individë apo kompani të përfshira në aktivitete të jashtëligjshme.
