Deputeti demokrat i Dibrës, Xhelal Mziu zbuloi në një studio televizive se PD kishte 2-3 kandidatësh për president, për të cilët qe e gatshme t’ia paraqiste palës socialiste në negociata, por për shkak se emrat nuk pranuan të propozoheshin për detyrën më të lartë në shtetin shqiptar, grupi parlamentar demokrat u detyrua t’i tërhiqte. Mziu shtoi se 2-3 kandidaturat ishin emra konkurrues për t’u zgjedhur president. “Ne kemi pasur tentativa për ta sfiduar me një emër, por këto emra që kanë pasur potencialin e nevojshëm nuk kanë pranuar për ta hedhur emrin e tyre në tavolinë, sepse kur të shkonin duke mos marrë konfirmimin, i bie keqpërdorim. Kanë qenë të paktën 2-3 emra konkurrues”, deklaroi ish-kryebashkiaku i Kamzës.
Për sa i përket bojkotimit të seancës parlamentare ditën ku u zgjodh Bajram Begaj si pasuesi i Ilir Metës, Mziu u përgjigj se nuk ishte qëllim i PD që të mos merrte pjesë në këtë seancë që në fillim, por për shkak se Partia Socialiste pas raundit të parë të bisedimeve për president konsensual kërkoi që kandidati i opozitës të paraqitej me 20 firma deputetësh të PD jo të përbashkët, u detyrua të mbante qëndrim kundërshtues ndaj mazhorancës. “Mazhoranca e kishte mundësinë, por në raundet e para përdori shoë dhe nuk ia dha këtë mundësi opozitës. Ideja është që mazhoranca të jap pëlqyeshmërinë e saj për këtë numër të kufizuar. Ne për të treguar që nuk jemi pro-bojkotit, por për të respektuar institucionin dhe postin e presidentit, kemi qenë të qëndrimit që duhet të merrnim pjesë, por meqë ndryshoi rregullat e lojës në mes të lojës, ne gjetëm një mënyrë për ta orientuar opinionin publik që marrëveshja u ndryshua, ai i kishte votat 77 vota nga 71”, vazhdoi më tej deputeti demokrat.
Për sa i përket pritshmërive nga presidenti i ri i Shqipërisë, Bajram Begaj, Mziu beson se ai do të jetë një njeri që do t’i bindet për gjithçka kryeministrit Edi Rama. “Ushtarakët zbatojnë urdhrin, pastaj mund ta diskutojnë. Nuk dua të luaj me kredibilitetin e tij, por gjasa janë që do kemi një president që do jenë në komandën e kryeministrit”, përfundoi deputeti i Dibrës, Xhelal Mziu.
/a.r
