Startoi në Hong Kong Samiti i 11-të i “Një brez, një rrugë”, duke mbledhur së bashku mbi 6000 zyrtarë dhe udhëheqës biznesi nga më shumë se 70 vende dhe rajone.
Në një botë që përballet me ndryshime të papara dhe fragmentim gjeopolitik, lidhshmëria, bashkëpunimi dhe konsensusi, që ofrohen nga nisma “Një brez, një rrugë”, janë tepër thelbësore, deklaroi John Lee, kreu ekzekutiv i Rajonit të Posaçëm Administrativ të Hong Kongut, citon “Xinhua”.
Sipas tij, kjo nismë nuk është një hartë e së kaluarës, por një plan i përbashkët për të ardhmen dhe Hong Kongu është vendi ku realizohet kjo pikëpamje.
Tregtia e mallrave të Hong Kongut me vendet partnere të “Një brez, një rrugë” u rrit me rreth 17 për qind vitin e kaluar në rreth 323 miliardë dollarë amerikanë.
Gati 1500 kompani nga vendet partnere të “Një brez, një rrugë” kanë hapur zyra në Hong Kong, ndërsa mbi 100 kompani nga këto ekonomi janë të listuara në Bursën e Hong Kongut, me më shumë në proces.
Frederick Ma, kryetar i Këshillit të Zhvillimit të Tregtisë së Hong Kongut, tha se nisma “Një brez, një rrugë” ka të bëjë me ndërtimin e lidhjeve më të ngushta dhe shndërrimin e potencialit në përfitime të prekshme globale, duke renditur ASEAN-in, Azinë Qendrore, Lindjen e Mesme, Afrikën dhe Amerikën Latine si fusha kryesore të mundësive.
Në ditën e parë të samitit u nënshkruan 32 memorandume mirëkuptimi dhe marrëveshje, që mbulojnë financat, shërbimet profesionale dhe ndërtimin.
