Tendenca e emigracionit nga Shqipëria ka shënuar një përshpejtim të ri. Sipas të dhënave të fundit të publikuara nga Eurostat, gjatë vitit 2025 vendet e Bashkimit Europian lëshuan 68,653 leje qëndrimi për herë të parë për shtetasit shqiptarë, duke shënuar një rritje prej 4% krahasuar me vitin e mëparshëm.
Ky tregues përmbys rënien prej 14% të regjistruar në vitin 2024. Megjithatë, vitet me nivelet më të larta të largimeve mbeten 2022 dhe 2023, me përkatësisht rreth 79 mijë dhe 77 mijë leje të lëshuara.
Format e reja të largimit dhe motivet e pajisjes me leje Statistikat e Eurostat dëshmojnë një ndryshim rrënjësor në dinamikën e emigrimit. Ndonëse kërkesat tradicionale për azil kanë rënë ndjeshëm në rreth 15 mijë në vit, shtetasit shqiptarë po shfrytëzojnë kanale të rregullta ligjore, kryesisht përmes kontratave të punës dhe bashkimit familjar.
Për vitin 2025, shpërndarja e lejeve të para të qëndrimit sipas arsyeve paraqitet si më poshtë:
Arsye familjare: 46.3% e totalit
Punësim: 29.4% e totalit
Arsim/Edukim: 0.8% e totalit
Arsye të tjera (përfshirë mbrojtjen): Pjesa e mbetur
Ndikimi në demografi dhe tregun e punës
Ritmet e larta të largimeve, të shoqëruara me rënien e lindjeve, vazhdojnë të tkurrur popullsinë e vendit, duke krijuar sfida kritike për tregun e punës, konsumin dhe skemat e pensioneve. Sipas të dhënave të INSTAT, popullsia e Shqipërisë më 1 janar 2026 zbriti në 2,335,930 banorë, duke pësuar një rënie prej 1.16% krahasuar me një vit më parë.
Në total, stoku i lejeve të vlefshme të lëshuara nga BE-ja për shtetasit shqiptarë ka arritur në 875,100. Kjo shifër e rendit Shqipërinë – një nga vendet me popullsinë më të vogël në kontinent – në listën e 10 vendeve jo-anëtare me më shumë përfitues të lejeve të qëndrimit në bllok, përkrah shteteve me popullsi shumë herë më të madhe si Maroku, Turqia, Ukraina, India apo Kina.
