Prokuroria e Shkodrës pas rreth katër muajsh ka përfunduar hetimet për vrasjen e ndodhur mbrëmjen e 14 tetorit të vitit të kaluar në lagjen “Skënderbeg”, ku 15 vjeçari Klodian Kolbuçaj goditi me thikë duke i marrë jetën, bashkëmoshatarit të tij Emiljano Gjoni.
“Prokuroria pranë Gjykatës së Shkallës së Parë të Juridiksionit të Përgjithshëm Shkodër, përfundoi hetimet dhe dërgoi në gjyq të miturin në konflikt me ligjin, shtetasin K.K për veprën penale “Vrasja në rrethana të tjera cilësuese”, të parashikuar nga neni 79, gërma “a” e Kodit Penal. Nga hetimet e zhvilluara në bashkëpunim me Drejtorinë Vendore të Policisë Shkodër në kuadër të procedimit penal nr.1538, të vitit 2024, u arrit të provohet se, në datën 14.10.2024, rreth orës 19:30, në vendin e quajtur lagjja “Skënderbeg”, rruga “Ing.Gjovalin Gjadri”, të qytetit të Shkodrës, i mituri në konflikt me ligjin K.K, pas një konflikti për motive të dobëta me të miturin E.Gj, e ka qëlluar këtë të fundit me një send prerës shpues, thikë duke i shkaktuar plagë vdekjeprurëse”, njofton organi i akuzës.
15-vjeçari Emiljano Gjoni u qëllua vetëm një herë me thikë në zemër, duke pësuar hemorragji që ia bëri të pamundur shpëtimin edhe pse u dërgua në spitalin rajonal të Shkodrës me shpejtësi nga një qytetar që u ndodh rastësisht në vendngjarje.
Viktima dhe autori frekuentonin të njëjtën shkollë, teksa ishin në vitin e parë në shkollën e mesme profesionale “Hamdi Bushati” në Shkodër.
Klodian Kolbuçi deklaroi para hetuesve se Emiljano e ka goditur me thikë në sup dhe për t’u vetëmbrojtur, ai pretendon se e ka marrë thikën e cila ka rënë në tokë dhe më pas e ka qëlluar për ta plagosur bashkëmoshatarin.
“Qëlluam të dy në lagje dhe Emiljano kishte një thikë në dorë. Ai më qëlloi në sup dhe gjatë përplasjes tonë fizike thika i ra në tokë. Unë e mora nga toka thikën që kishte Emiljano më parë dhe për t’u vetëmbrojtur e qëllova me idenë për ta plagosur dhe më pas u largova nga vendngjarja”, ka rrëfyer 15-vjeçari, i cili u pyet në praninë e psikologut dhe avokatit për shkak të moshës së tij si i mitur.
