Komisioni Europian vlerëson se Kosova, ndonëse gëzon mbështetje të fortë publike për anëtarësimin, gjatë periudhës së fundit është penguar nga bllokadat institucionale, zgjedhjet e shpeshta dhe përparimi i kufizuar në reforma.
Në raport theksohet se ka pasur rezultate pozitive në luftën kundër krimit të organizuar, ndërsa heqja e masave ndëshkuese ka mundësuar rifillimin e bashkëpunimit dhe asistencës financiare europiane, shkruan A2.
Tashmë, me institucione funksionale, Prishtina këshillohet të përshpejtojë reformat, veçanërisht në sundimin e ligjit dhe të normalizojë marrëdhëniet me Serbinë, ndërsa Komisioni shprehet i gatshëm të përgatisë opinionin për aplikimin e Kosovës për anëtarësim, nëse këtë e kërkon Këshilli Europian.
Sa i përket Serbisë, Brukseli shpreh shqetësim për nivelin e përafrimit me politikën e jashtme dhe të sigurisë së BE-së, dhe kërkon një përcaktim të qartë për orientimin strategjik. Gjithashtu kushtëzon përparimin në negociata me normalizimin e marrdhënieve me Kosovën.
