Erjola Struga ka protestuar të hënën para Prokurorisë së Korçës, pasi kërkon përshpejtimin e hetimeve për edukatoren e kopshtit numër 9 në qytet. Sipas saj, edukatorja i ka dhunuar fëmijën dhe duhet të dënohet për këtë, shkruan A2 CNN.
Ajo shprehet se është e papranueshme që prokuroria të vonojë hetimet ndaj kësaj çështjeje
“Unë kam bërë protestë në heshtje por kumbuese e për ata prindër që kanë përjetuar të njëjtën gjë e nuk kane mundur te flasin. Duhet të jetë kumbuese edhe për institucionet, edhe për drejtorinë e kopshteve dhe çerdheve në bashkinë e Korçës të cilët nuk kanë marrë asnjë masë ndaj edukatoreve. Në prokurori kam dalë sepse kërkoj që të bëhet përshpejtimin e hetimeve, nuk mund të them qëllimshme por është e papranueshme të bëhet një zgjatje e tillë e hetimit dhe nuk është marrë asnjë masë”, thotë ajo.
Jashtë kamerave, drejtues të kopshtit nr. 9 të qytetit të Korçës mohojnë kategorikisht të ketë pasur dhunë ndaj fëmijës së shtetases Erjola Struga, e shtojnë se ndaj kësaj shtetase është kryer një kallëzim në prokurori për mashtrim publik.
