Ka përfunduar procesi i numërimit të votave preferenciale në Fier. Ceno Klosi ka rezultuar kandidati më i votuar me mbi 16 mijë vota.
Në përfundim të këtij procesi drejtuesja politike e Partisë Socialiste për këtë qark, thekson se për të si drejtuese është kënaqësi që shqiptarët nuk kanë votuar vetëm për subjektin politik, por janë pëlqyer edhe kandidatët që PS ka futur në listë.
Balluku ndër të tjera shprehet se kjo listë ka qenë gjithëpërfshirëse.
“Ka qenë në proces numërimi i votave individuale që ka mbaruar me sukses, pa asnjë konflikt. Dua të falënderoj të gjithë komisionerët dhe padyshim edhe anëtarët e KZAZ 60 që e kanë pasur punën pak më të vështirë për shkak të shumë kutive që ka duke qenë se përfaqëson qytetin e Fierit.Votat individuale në një bashki me kaq votues është normale që të ketë edhe vota individuale që po konkurrojnë në rang vendi, pasi kam parë që ata që kanë dalë këtu janë rreshtuar në rang vendi. Ceno Klosi është i pari me mbi 16 mijë vota, Klevis Jahaj i dyti me rreth 13 mijë vota. Për mua është kënaqësi sepse shikoj që nuk është mbështetur vetëm subjekti, por edhe zgjedhjet që ne kemi bërë për deputetë. Duhet thënë që kësaj rradhe ne kishim një listë që gjithkush ishte i përfaqësuar”, theksoi Balluku.
Ndërkohë sa i takon kandidatëve që pritet të futen në Kuvend nga numërimi i votave brenda vendit për Partinë Socialiste e cila ka 12 mandate në qarkun e Fierit janë: Belinda Balluku, Petrit Malaj, Kiduina Zaka, Ana Nako, Ceno Klosi, Klevis Jahaj, Asfloral Haxhiu, Antoneta Dhima, Elton Korreshi, Zegjine Çaushi, Dhimitër Kruti.
Sa i takon Partisë Demokratike e cila ka 4 mandate në këtë qark, deputetët pritet të jenë ato nga lista e mbyllur: Gazmend Bardhi, Luan Baçi, Brunilda Haxhiu, dhe Saimir Korreshi.
