Shqipëria renditet e 44-ta në botë nga 169 vende, me një rezultat prej 75.4 pikësh, sipas Sustainable Development Report 2026.
Raporti vlerëson progresin e vendeve në 17 Objektivat e Zhvillimit të Qëndrueshëm të Agjendës 2030.
Objektivi ,“Pa varfëri”, rezulton i arritur, ndërsa për energjinë e pastër dhe të përballueshme (SDG 7) Shqipëria paraqitet gjithashtu në kategorinë e objektivave të arritura. Në të njëjtën kohë, disa objektiva shfaqin ende sfida të rëndësishme, ndërsa të tjerë janë në proces përmirësimi. Edhe edukimi me kualitet shfaqet si një objektiv I arritur.
Në veçanti, arsimi, shëndetësia, barazia gjinore, uji dhe kanalizimet, inovacioni dhe infrastruktura, si dhe veprimi ndaj klimës paraqiten me tendencë përmirësimi, por pa u konsideruar ende objektiva të përmbushura. Ndërkohë, puna e denjë dhe rritja ekonomike, konsumi dhe prodhimi i përgjegjshëm, jeta nën ujë, jeta në tokë, paqja dhe institucionet, si edhe partneritetet, shfaqin sinjale ngecjeje në raport.
Një tregues tjetër i rëndësishëm është Spillover Score, ku Shqipëria merr 89.5 pikë. Ky tregues lidhet me ndikimin që një vend ka përtej kufijve të tij përmes tregtisë, ekonomisë dhe faktorëve të tjerë që ndikojnë në zhvillimin e qëndrueshëm global.
Për Shqipërinë, vlerësimi i vitit 2026 e vendos vendin në një pozicion relativisht të fortë në rajon, por njëkohësisht tregon se arritja e objektivave të zhvillimit të qëndrueshëm nuk është e njëtrajtshme. Edhe OKB-ja në Shqipëri, në rishikimin kombëtar të vitit 2026, thekson se vendi ka bërë progres në uljen e varfërisë, energjinë e rinovueshme, infrastrukturën, transformimin digjital dhe modernizimin institucional, por mbeten sfida në pabarazitë sociale, ndryshimet demografike, migracionin, aftësitë profesionale dhe klimën.
Me 75.4 pikë, Shqipëria renditet mes vendeve me performancë relativisht të mirë, por ka ende objektiva ku progresi duhet të përshpejtohet deri në vitin 2030.
