Kryeministri Edi Rama zbuloi gjatë konferencës së përbashkët për shtyp me kancelarin Olaf Scholz se gjatë takimit me të mori një gadishmëri tepër inkurajuese nga Gjermania për të avancuar me procesin e integrimit në ballkanin Perëndimor.
“Ishte vërtetë kënaqësi të merrja ftesën tuaj dhe të ritakoheshim pas takimit të parë në qytetin e mrekullueshëm të Hamburgut. Nga ana tjetër jam shumë i inkurajuar nga biseda me kancelarin sepse gjeta një gadishmëri jashtëzakonisht inkurajuese të tij dhe të Gjermanisë për të shtyrë me më shumë vendosmëri përpara procesin e integrimit të Ballkanit Perëndimor.
Shpresojmë që të ndodhë në Këshillin e ardhshëm në muajin Qershor.
E çmojmë shumë konsideratën dhe vlerësimet që kancelari evidentoi për progresin që kemi bërë, por kemi ende shumë për të bërë në të gjitha drejtimet.
Jemi të vendosur të bëjmë shumë më shumë, ne kemi si qëllim të ndërtojmë një Shqipëri me standartet evropiane dhe këtë nuk ia dedikojmë Brukselit apo Berlinit, por ia dedikojmë fëmijëve tanë”, tha Rama.
Për ne procesi i integrimit europian nuk është një proces për të shkuar në Evropë por për të ndërtuar një Shqipëri me standarde e BE, dhe këtë ia detyrojmë fëmijëve tanë. Sigurisht që ne kemi tërësisht në një linjë me Kancelarin, sikundër e gjithë BE, në raport me agresionin rus mbi Ukrainën. Ne i dënojmë njëzëri krimet mizore që po kryhen atje dhe kërkojmë armëpushim sa më të shpejte dhe negociata sa më të vërteta që të përfundojë ky kalvar që po shkatërron jetën e miliona njerëzve, që po bën reale atë që ne mendonim se nuk do përsëritej kurrë më, një luftë në Evropë.
Së treti, vlerësoj dëshirën e tij për t’i dhënë një impuls të ri Procesit të Berlinit, që e ka sot më të domosdoshëm se kurrë një përshpejtim të ri. Unë e informova Kancelarin edhe për ‘Ballkanin e hapur’ që nuk është gjë tjetër vetëm një përpjekje për ta jetësuar Procesin e Berlinit”, tha Rama./m.j
