Një ditë pas ngjarjes së rëndë ku 37-vjeçari Marjan Levanti plagosi me thikë familjarët e ish-gruas, tvklan.al ka siguruar një video ekskluzive nga brenda banesës.
Në video duket kuzhina e cila është e mbuluar me njolla gjaku. Po ashtu njolla gjaku ka dhe në shkallët dalëse të banesës, dëshmi kjo e përpjekjeve që kanë bërë të plagosurit për t’ju larguar agresorit.
Mbrëmjen e ditës së premte, rreth orës 20:30, Marjan Levanti shkoi tek banesa e ish-gruas së tij, Elena Levanti ( Kocaqi), e cila jetonte me dy prindërit dhe të vëllain.
Pas grindjeve, 37-vjeçari ka sulmuar me thikë, duke plagosur: ish-vjehrrin Ferit Kocaqi, ish-vjehrrën Qanie Kocaqi dhe ish-kunatin A.Kocaqi.
Levanti u prangos disa orë pasi kishte kryer krimin në një pallat, i cili ishte në ndërtim, në afërsi të shtëpisë ku kreu krimin.
37-vjeçari, i dënuar dhe më parë për plagosje, ka dhënë dhe dëshminë e tij në para hetuesve. Ai ka sqaruar se kishin qenë familjarët e gruas së tij të cilët kishin ndikuar tek ajo për të nisur procedurat për divorcin.
Sipas të dhënave që tvklan.al ka siguruar në Gjykatën e Tiranës rezulton se me datën 01 Dhjetor 2016 , shtetasja Elena Levanti ka regjistruar në padi për zgjidhje martese.
Objekti i çështjes ka të bëj me zgjidhjen e martesës, lënien e fëmijëve për rritje dhe edukim nënës, përcaktimin e masës së detyrimit ushqimor për fëmijët dhe ndryshimin e mbiemrit nga Levanti në Kocaqi (mbiemri i vajzërisë) së paditëses. Seanca e parë gjyqësore për palët ishte caktuar data 17 Janar e vitit tjetër.
Marjan Levanti është vëllai i ish boksierit, Adrian Levanti. Ky i fundit është ekzekutuar me 7 plumba pistolete në 26 prill të 2013. Atentati ndodhi në katin e shtatë të pallatit ku banonte, në zonën e Unazës së Re në Tiranë.
Më 18 mars 2013 Marjan Levanti kishte plagosur me thikë shtetasin Zef.Gj, komshi, pas një konflikti për zhurmët. Vëllai i Zef. GJ u arrestua si i dyshuar për vrasjen Adrian Levanti, vëllai i Marjan Levanti./Klan/ma.me
