Mund të ishte kthyer në tragjedi një ngjarje e pamenduar dhe e papritur, që ka ndodhur gjatë ditës së sotme në qytetin e Durrësit. Një video e ardhur në redaksinë tonë tregon se si ka shpëtuar për një fije nga shkrumbimi një familje e një pallat i tërë, pasi bombola e gazit e një familjeje në katin e gjashtë të pallatit është çarë dhe ka nisur të rrjedhë.
Ngjarja ka ndodhur në lagjen 13 në zonën e plazhit në Durrës. Pasi ka nisur rrjedhja e gazit (arsyet nuk i dimë pse), kryefamiljari e ka rrëmbyer bombolën dhe e ka nxjerrë jashtë ballkonit të banesës për të shpëtuar familjarët e tjerë që ndodheshin në shtëpi në atë moment. Për fat të mirë asnjë gjë nuk ka ndodhur, por në rast se bombola do të ishte e ndezur, çfarë do të ishte bërë me këtë familje?
Normalisht, në të tilla raste këshillohet që kur ka rrjedhje gazi bombola të nxirret në ambiente të hapura, por në kushtet e zotërisë dhe të banesës së tij, ky veprim mund të kishte shkaktuar një tjetër tragjedi, pasi nga pakujdesia apo ndoshta nga mosqenia në dijeni të rrjedhjes së gazit, fqinji që ndodhej një kat më poshtë, në katin e pestë, mund të kishte ndezur bombolën e tij në shtëpi dhe i gjithë pallati të ishte hedhur në erë.
