Hōlei Sea Arch, një nga formacionet më të fotografuara në Parkun Kombëtar të Vullkaneve në Hawaii, është shembur pas dekadash shenjash të paqëndrueshmërisë së shkëmbinjve. Harku gjigant prej shkëmbi lavik, rreth 27.4 metra i lartë, besohet se ishte formuar rreth 550 vjet më parë.
Shërbimi i Parqeve Kombëtare të SHBA-së (NPS) bëri të ditur se koha e saktë e shembjes nuk dihet. Harku ishte ende i dukshëm më 23 shtator, ndërsa deri më 27 shtator ishte zhdukur plotësisht.
Formacioni ndodhej në Parkun Kombëtar të Vullkaneve në ishullin Hawaii, i njohur edhe si “Ishulli i Madh”.
Vija bregdetare përreth harkut kishte shfaqur prej vitesh shenja paqëndrueshmërie. Në vitin 2021, autoritetet paralajmëruan se formacioni natyror do të shembej përfundimisht.
Në janar të vitit 2020, çarje të reja dhe shenja të tjera destabilizimi në shkëmbinjtë përreth çuan në mbylljen e pikës origjinale të vëzhgimit. Disa muaj më vonë u hap një pikë e re, në një distancë më të sigurt.
Valët e një stuhie tropikale gjatë po atij viti kishin shkëputur më herët një pjesë të shkëmbit në bazën e harkut.
Shembja e Hōlei Sea Arch tashmë konsiderohet pjesë e transformimit të vazhdueshëm të vijës bregdetare të egër dhe të izoluar të parkut.
Autoritetet amerikane e kishin përshkruar më herët harkun si një formacion të bukur, por të përkohshëm, duke theksuar se jetëgjatësia e tij ishte e kufizuar dhe se, me kalimin e kohës, ai do të binte në det.
Për vite me radhë, Hōlei Sea Arch ishte një destinacion i preferuar për turistët dhe fotografët që vizitonin Parkun Kombëtar të Vullkaneve.
Shembja besohet të ketë ndodhur në një periudhë kur parku ishte mbyllur përkohësisht për shkak të Stuhisë Tropikale Nolo.
Lajmi ka shkaktuar reagime të shumta në rrjetet sociale, ku mijëra njerëz kanë komentuar dhe ndarë fotografi të harkut, duke kujtuar vizitat e tyre në këtë pikë të veçantë të bregdetit hawajan.
Me zhdukjen e Hōlei Sea Arch, një tjetër formacion i krijuar nga proceset natyrore është rikthyer në oqean, ndërsa autoritetet theksojnë se ndryshimi i vijës bregdetare do të vazhdojë dhe se formacione të tjera mund të krijohen me kalimin e kohës.
