Armando Meta
JAVANEWS/ Ligji për vetting-un përmban në brendësi të tij edhe “kulaçin edhe kërbaçin” për të gjithë ata gjyqtarë apo prokurorë, të cilët rezultojnë se kanë ushtruar detyrën duke nëpërkëmbur drejtësinë dhe duke e shfrytëzuar atë për pasurim personal apo promovim në hirarkinë e sistemit të drejtësisë, nëpërmjet korrupsionit politik. Tashmë letrat janë mbi tavolinë. Ata ose duhet të provojnë të gjejnë të çara në ligjin për vetting-un për të mbijetuar, ose duhet të ikin vullnetarisht dhe të gëzojnë “plaçkën e vjedhur” për vite të tëra duke mjelur drejtësinë. Shumë gjyqtarë dhe prokurorë, pasi Gjykata Kushtetuese ndezi dritën e gjelbër për vetting-un, tashmë janë në dilemë që të vazhdojnë betejën për mbijetesë, apo të dalin në pension të parakohshëm.
Reformën në Drejtësi, ndërsa përpiqet nga njëra anë të disiplinojë sistemin e drejtësis, duke pastruar nga rradhët e këtij sistemi gjykatësit dhe prokurorët e paaftë e të korruptuar, nga ana tjetër ofron amnisti për të gjithë ata persona, të cilët rezultojnë me probleme gjatë procesit të vetting-ut, sa i përket pasurive apo edhe shkeljeve të bëra gjatë ushtrimit të detyrës. Në kapitullin për Masat Disiplinore, gjyqtarëve dhe prokurorëve u lihet një “derë” e hapur se nëse bien dakord me Komisionin e Pavarur të Kualifikimit, “për të dalë në pension më herët”, mund ta marrin pensionin menjëherë. Shuma e pensionit reduktohet duke marrë parasysh vitet e punës të kryera nga gjyqtarët apo prokurorët dhe vitet e mbetura deri në moshën e pensionit. Thënë më thjeshtë, të gjithë ata që largohen vullnetarisht nga sistemi i drejtësis, nuk do të jenë më objekt apo subjekt i reformës.
Në ligj parashikohet amnisti për pjesën që ka të bëjë me ata gjyqtarë apo prokurorë, të cilët gjatë procesit të verifikimit të pasurive rezultojnë se kanë pasuri që nuk arrinë ta justifikojnë me atë ardhurat e tyre. Ligji sqaron elementët që kanë të bëjnë me masat për t’i larguar nga sistemi i drejtësis, të gjithë ata gjyqtarë dhe prokurorë që kanë vënë pasuri në mënyrë të paligjshme dhe që nuk e kanë të mundur të justifikojnë pasurinë. Barra e provës për pasurinë që ata disponojnë u mbetet atyre. Në rastin që ata nuk arrinë ta provojnë pasurinë që kanë, çfarë ndodh me ta? Thjeshtë largohen nga sistemi? A do të ndiqen edhe penalisht? Ligji ndonëse nuk jep një përcaktim të qartë në këtë drejtim, duket se një “pension i parakohshëm vullnetar”, do të ishte një lloj amnistie për ta. Sa prej gjyqtarëve dhe prokurorëve do të zgjedhin një zgjidhje të tillë mbetet për t’u parë. Por një mundësi “për t’ia hedhur paq” duket se e kanë.
