Vëllai i oficerit të RENEA-s që u vra dje në Lazarat, Ibrahim Basha, ka thënë se ka folur me të vëllanë pak orë para ngjarjes së rëndë.
“Më tha që ishte mirë” tregon Denis Basha për Panorama.
Ai rrëfen se ishte shumë i lidhur me të vëllanë dhe kalonte shumë kohë me të.
Denisi thotë se i vëllai e ka nisur e forcat Komando dhe ka qenë 5 herë në Irak e Afganistan, ndërsa një vit më parë konkurroi për të qenë pjesë e RENEA-s dhe fitoi.
“E ka nisur ushtrinë me forcat komando, më pas në fund kaloi te forcat speciale të ushtrisë.
Ka punuar në Forcat e Armatosura 10-11 vjet, ka qenë në 5 misione paqeruajtëse jashtë vendit, në Irak dhe Afganistan”, thotë ai.
Denisi kërkon nga shteti gjetjen sa më parë të autorëve të vrasjes së vëllait të tij dhe ndëshkimin e tyre.
