Kryebashkiaku Erion Veliaj komentoi dhe mbledhjen e fundit të këshillit Bashkiak dhe marrëdhëniet me këshilltarët e Lëvizjes Socialiste për Integrim. Kreu i Bashkisë nuk mohoi zhgënjimin ndaj veprimit të këshilltarëve të LSI për të mos marrë pjesë në mbledhjen e Këshillit ku u miratua plani i biznesit që i hap rrugë investimeve në Tiranë për furnizimin me ujë 24 orë dhe 1 mijë kredive të buta për familjet në nevojë.
“M’u deshën dy njerëz të arsyeshëm, që vendosën që Tirana të kishte 24 orë uje. Propozimi im nuk ishte partiak. Propozimi im ishte kush do Tiranën 24 orë. Dy njerëz të mirë vendosën që të mos e linin Tiranën pa ujë për partinë”, tha ai për ABC NEWS.
Veliaj deklaroi se ka pasur një marrëdhënie tejet korrekte me ish-kreun e LSI, Ilir Meta, ndërsa thekson se diçka ndryshoi pas largimit të tij nga kjo forcë politike.
“Unë kam pasur një marrëdhënie shumë të mirë me LSI, e kam një marrëdhënie shumë të mirë me LSI. Duhet të pranoj se me z. Meta kam pasur një marrëdhënie jashtëzakonisht korrekte, nuk kam asnjë kompleks që ta them këtë , pavarësisht se si shkuan gjërat politike në fushatë. Unë s’kam asnjë kompleks që të them që unë dhe Ilir Meta kemi pasur marrëdhënie shumë korrekte. Diçka ndryshoi me ikjen e Ilir Metës në presidencë. Dhe duhet ta them këtë apriori, unë e mirëkuptoj. Pra një parti që në një muaj ndërroi tre kryetarë, pra Ilir Metën, Petrit Vasilin, Monika Kryemadhin, sigurisht që merr kohë që të axhustohesh. Dhe ia dedikoj këtë lapsus, këtë keqkuptim, këtë mosmarrëveshje këtij axhustimi të një partie që në një muaj ndërroi tre kryetarë. Unë sigurisht ndihem mirë që arsyeja triumfoi. A do kisha dashur, që jo vetëm për ujin, LSI të votonte të paktën për kreditë e buta? Ishte një program i shkëlqyer që u drejtua me porosi të veçantë nga ana ime nga nënkryetarja e bashkisë”, theksoi Veliaj.