Analisti Lorenc Vangjeli e ka cilësuar protestën e fundit të Partisë Demokratike si një “gjendje teatri”, duke e konsideruar pjesë të një skenari të përsëritur politik.
Në emisionin “Trialog”, ai u ndal te disa elemente që, sipas tij, dallojnë këtë protestë nga të mëparshmet duke veçuar arrestimin dhe masa “arrest me burg” për pesë protestues, një hap që ai e sheh si një strategji të policisë për të dekurajuar pjesëmarrjen në protesta.
Së dyti, ai shprehu mendimin se policia ka qenë e informuar paraprakisht dhe ka ndërhyrë menjëherë për ta neutralizuar atë.
Ndërsa si element të tretë, Vangjeli përmendi përplasjet që çuan edhe në goditjen e disa deputetëve të Partisë Demokratike, duke e cilësuar këtë si një përshkallëzim të situatës.
“Kësaj radhe ka pasur tre detaje të tjera; njëra, që ishte më kryesorja, ka qenë ajo që më parë lexohej përtej komunikatave të përditshme të Policisë së Shtetit për shtyp, pra ajo që ndodhte 2 apo 3 ditë më pas në sallën e gjyqit. Kësaj radhe ka pasur arrestime.
Gjykata ka firmosur masën “arrest me burg” për 5 protestuesit. Kjo ka qenë një lloj strategjie e policisë në vijimësi për të dekurajuar protestat. Të gjithë të shoqëruarve u merrej një deklarim në ambientet e komisariatit dhe, kur liheshin të lirë, në protestën e radhës nuk ishin këta që do të mbanin molotovin në dorë, për të mos qenë përsëritës.
E dyta, policia ka qenë e informuar për bërthamën agresive të protestës dhe ka pasur një ndërhyrje të menjëhershme.
E treta ka të bëjë me një goditje që kësaj radhe thuajse ishte faulli i kësaj të premteje, me një përplasje që gati ishte e targetuar ndaj disa personazheve, dhe kjo ndodhi kur u goditën disa deputetë të Partisë Demokratike”, tha Vangjeli.
Duke e konsideruar teatër me skenar mes Policisë dhe protestës, për analistin, numri i protestuesve nuk ka arritur përmasat e një proteste masive, duke mbetur kështu brenda një pjesëmarrjeje të kufizuar.
“I njëjtë është edhe numri i protestuesve që morën pjesë. Pra, nuk e ka kaluar numrin e asaj që quhet një protestë e madhe Në këto momente mund të them që kjo më ngjan si vënia në skenë e një loje lufte. Nga njëra anë mazhoranca, nëpërmjet policisë, që bën sikur reagon fort, por në fakt vetëm kjo përmasë dhune i jep vlerë kësaj proteste. Nga ana tjetër duket se gjithmonë një grup i PD-së është aty, si për të treguar se është prezent dhe kryen “adetin” e radhës. E gjitha një gjendje teatri”, u shpreh ai.
