Një 19-vjeçare, e cila dhunohej fizikisht prej disa vitesh në mënyrë sistematike nga babai i saj, tentoi të vetëvritet në maj të vitit 2015 në Tiranë, shkruan gazeta Panorama.
Përveç dhunës me dru, grushte e shkelma, i ati e kishte ndaluar të dilte nga shtëpia. Në gjendje të rënduar mendore, ajo preu damarët e duarve me një mjet prerës. Falë dërgimit të shpejtë nga familjarët në spital, mundi t’i shpëtojë vdekjes. Babai i dhunshëm, Zyhdi Q., përfundoi si i pandehur në Gjykatën e Tiranës me akuzën e “shkaktimit të vetëvrasjes”. Pak ditë më parë, gjyqtarja Migena Laska përfundoi gjykimin ndaj tij, duke e shpallur të fajshëm për këtë akuzë. Ai u dënua me 3 vjet heqje lirie.
Për shkak të gjykimit të shkurtuar përfitoi uljen e një të tretës. Sipas vendimit të gjykatës, rezultonte e provuar se veprimi i 19-vjeçares ishte ndikuar nga gjendja e rënduar mendore e shkaktuar nga dhuna e babait të saj. Dhuna e të atit është pohuar nga vetë e dëmtuara R.Q., por është konfirmuar edhe nga e ëma e saj, si dhe nga një prej dy motrave të mitura. Gjatë gjykimit, i pandehuri ka pranuar akuzën dhe ka shprehur pendesë të thellë.
Panorama
