Verdi Morava, i cili vuan dënimin prej 5 vitesh në burgun e Fushë-Krujës si pjesë e grupit të 9 myslimanëve që u gjykuan për terrorizëm, ka ndërmarrë një vendim për të hyrë në grevë urie.
Prej 22 ditësh ai nuk ka pranuar asnjë shërbim nga administrate e burgut duke rrefuzuar çdo ushqim.
Morava ka depozituar një kërkesë pranë organeve të burgut ku kërkon më shumë vemendje ndaj të burgosurve që vuajnë dënimin pasi sipas tij gjendja e brendshme është skandaloze.
Morava, kontaktoi gazetën “TemA” nga burgu ku apelon që institucionet të tregohen më të përgjegjshme dhe të rehabilitojnë gjendjen.
“Kam 22 ditë që kam ndërrmarë këtë akt dhe do ta vazhdoj deri sa të përmbushen kërkesat që kam parashtruar. Përmes saj kërkoj të drejtat që i takojnë çdo të burgosuri, nga ushqimi që është skandaloz, te higjena që është e munguar, te çmimet e dyqaneve të brendshme që janë të kripura apo te trajtimi që ofrohet”, shprehet Verdi Morava i cili gjithashtu parashtron kërkesën për një takim me ministren e Drejtësisë Etilda Gjoni.
I cilësuar nga organi i akuzës si financuesi i rrjetit që mundësonte dërgimin e mercenarëve shqiptarë në betejat siriane, Morava tregon se asgjë nuk është e vërtetë duke nënvizuar se procesi ka qenë i manipuluar dhe se nuk ka pasur asnjë prove që ta implikojë atë.
“Unë do ta vazhdoj betejën time ligjore deri në fund pasi nuk ka asnjë provë që të më implikojë. Është tërësisht një proces i manipuluar dhe qesharak që më ka dëmtuar shumë në çdo aspekt. Pasi të rezaurohen të gjitha organet shqiptare unë do t’i drejtohem gjykatës së Strasburgut për të gjetur të drejtën time”, apelon Morava i cili nuk i ka pranuar asnjëherë akuzat.
Ndërkohë, i ati i tij Dielli Morava, rrëfen se i biri ka kaluar në izolim pas marrjes së këtij vendimi.
“Verdi është i pafajshem, greva e urise ishte e detyrueshme. Autoritetet e burgut e kanë kaluar në izolim pas fillimit të grevës së urisë. Çështja e djalit tim pritet te kaloj edhe ne Strasburg”, tha Dielli Morava.
Verdi Morava ishte një nga nëntë të akuzuarit që u shpall fajtor për rekrutim të shqiptarëve dhe dërgimin e tyre në Siri për të luftuar për grupimet terroriste ISIS dhe Al Nusra në maj të vitit 2016. /TemA
