Turizmi shqiptar po mbyll një sezon të mirë, me rritje të ndjeshme të numrit të vizitorëve, ndërsa sipas INSTAT, vetëm në qershor numri i vizitorëve të akomoduar u rrit me 17% krahasuar me një vit më parë. Për mikrofonin e RTSH, eksperti i turizmit Zak Topuzi thotë se tashmë Shqipëria po kthehet në një destinacion turistik gjithëvjetor.
“Tashmë është e konsoliduar. Shqipëria ka zënë një pozicion të rëndësishëm në Mesdhe. Ka konsoliduar pozicionin e saj si një vend i sigurt. Këtë e tregojnë edhe lëvizjet e turistëve, të cilët nuk janë vetëm të rinj, por edhe familje me fëmijë të vegjël. Dhe nuk është më destinacion vetëm Tirana apo disa pole, por pothuajse e gjithë Shqipëria. Nuk bëhet fjalë më për fillim sezoni apo mbarim sezoni. Sot bëhet fjalë për një turizëm gjithëvjetor”, u shpreh eksperti i turizmit, Zak Topuzi.
Por krahas rritjes së turizmit, sipas ekspertit Topuzi sektori vijon të përballet me sfida si informaliteti, transporti publik dhe menaxhimi i mbetjeve.
“Jemi të sëmurë kronikisht lidhur me infrastrukturën, mbetjet, bllokimin e rrugëve nga trafiku, informalitetin dhe standardet. Pra, jemi akoma në fazën ku vetëm 22% e kapaciteteve akomoduese janë hotele dhe 78% janë apartamente dhe vila që jepen me qira. Pjesa më e madhe e tyre është jashtë skemës së kontrollit, jashtë standardeve, dhe kjo bën që informaliteti të mos japë shifra reale”, tha eksperti.
Sipas ekspertit adresimi i këtyre problematikave mbetet thelbësor për të garantuar një turizëm më të qëndrueshëm dhe konkurrues në vitet e ardhshme.
